సూపర్ స్టార్ పై సంతోష్ శివన్ ప్రశంసల జల్లు

ప్రముఖ సినిమాటో గ్రాఫర్ సంతోష్ శివన్ సూపర్ స్టార్ మహేష్ బాబు పై ప్రశంసల జల్లు కురిపించాడు. ప్రిన్స్ ఎనర్జీ అద్భుతమని అభినందించాడు. ఏఆర్ మురుగదాస్ దర్శకత్వంలో మహేష్ బాబు నటిస్తున్న ద్విభాషా చిత్రానికి సంతోష్ శివన్ పనిచేస్తున్నారు. రోజా, దిల్ సే, రావణ్ చిత్రాలను తమ కెమెరా పనితనంతో అందంగా చూపించిన ఈయన తొలి సారి ప్రిన్స్ తో కలిసి పనిచేస్తున్నారు. ఈ సినిమా గత రెండువారాలుగా చెన్నైలోని ఈవీపీ ఫిలిం సిటీలో వేసిన భారీ సెట్ లో చిత్రీకరణ జరుపుకుంటోంది.

ఇక్కడ కొన్ని కీలకమైన యాక్షన్ సన్నివేశాలను షూట్ చేశారు. ఈ సందర్భంలో మహేష్ నటనను దగ్గరుండి పరిశీలించే అవకాశం సంతోష్ శివన్ కి దక్కింది. రేపటితో ఇక్కడి షెడ్యూల్ పూర్తి కానుంది. కావున ఆయన మీడియాతో ముచ్చటించారు. ” సూపర్ స్టార్ తో పనిచేయడం నాకు చాలా ఆనందంగా ఉంది. మహేష్ పవర్ అపారం. ప్రిన్స్ ఇక్కడ షూటింగ్ చేయటం చెన్నై కే కొత్త ఎనర్జీ తీసుకొచ్చింది.” అని చెప్పారు. తమిళ నటుడు, దర్శకుడు ఎస్.జె.సూర్య విలన్ గా నటిస్తున్న ఈ చిత్రం వచ్చే ఏడాది వేసవికి విడుదల కానుంది.