అర్జున్ రెడ్డి రీమేక్ పై షాహిద్ కపూర్ క్లారిటీ!

“అర్జున్ రెడ్డి” చిత్రాన్ని దర్శకుడు సందీప్ రెడ్డి హిందీలో రీమేక్ చేయనున్నాడని, ఆ చిత్రంలో కథానాయకుడిగా ఇటీవల “పద్మావత్” చిత్రంతో సూపర్ హిట్ కొట్టిన షాహిద్ కపూర్ నటించనున్నాడని వార్తలొచ్చాయి. అయితే.. ఈ విషయమై దర్శకుడు సందీప్ రెడ్డి స్వయంగా తన సోషల్ మీడియా ఎకౌంట్ ద్వారా తాను ఈ చిత్రం చేయడం లేదని చెప్పినప్పటికీ.. ఈ రీమేక్ లో హీరోగా షాహిద్ కపూర్ నటిస్తున్నాడని నేషన్ మీడియా మొదలుకొని యావత్ సోషల్ మీడియా భారీ స్థాయిలో పబ్లిసిటీ చేయడంతో అందరూ ఈ వార్త నిజమే అనుకొన్నారు.

అయితే.. “అర్జున్ రెడ్డి” రీమేక్ విషయమై షాహిద్ కపూర్ ను ముంబై మీడియా ప్రశ్నించగా ఆయన చాలా సింపుల్ గా “నన్నసలు ఆ సినిమా కోసం ఎవరూ అప్రోచ్ అవ్వలేదు. పైగా ఆ రీమేక్ లో నటించే ఉద్దేశ్యం కూడా తనకు లేదు” అంటూ షాహిద్ కపూర్ చెప్పేయడం ప్రస్తుతం చర్చనీయాంశం అయ్యింది.

అయితే.. సందీప్ రెడ్డి ఇటీవల మహేష్ బాబుకు ఒక కథ చెప్పాడని, త్వరలోనే ఆ సినిమా సెట్స్ కు వెళ్ళే అవకాశం కూడా ఉందని వార్తలు వస్తుండడంతో.. “అర్జున్ రెడ్డి” హిందీ రీమేక్ ఇప్పట్లో లేనట్లేనని తెలుస్తోంది. అయితే.. ఈ కన్ఫ్యూజన్ కి క్లారిటీ దొరకాలంటే మాత్రం సందీప్ రెడ్డి స్పందించాల్సిందే. ఆయన స్పందించి తన నెక్స్ట్ సినిమా ఏమిటనేది సందీప్ రెడ్డి క్లారిటీ ఇచ్చేవరకూ ఇలాంటి గాసిప్పులు గోల చేయడం షరా మామూలే.