నాగ చైతన్య (Naga Chaitanya) , సాయి పల్లవి (Sai Pallavi) జంటగా నటించిన తండేల్ (Thandel) గ్రాండ్ రిలీజ్‌కు రెడీ అవుతోంది. చందూ మొండేటి (Chandoo Mondeti) దర్శకత్వంలో రూపొందిన ఈ పీరియాడిక్ లవ్ పేట్రియాటిక్ డ్రామా, గీతా ఆర్ట్స్ 2 బ్యానర్‌పై భారీ బడ్జెట్‌తో తెరకెక్కింది. ఫిబ్రవరి 7న ప్రపంచవ్యాప్తంగా విడుదలకు సిద్ధమైన ఈ చిత్రం, చైతన్య కెరీర్‌లోనే హయ్యెస్ట్ బడ్జెట్ మూవీగా నిలిచింది. ఈ నేపథ్యంలో చిత్రయూనిట్ ప్రమోషన్లను వేగవంతం చేసింది. ఇప్పటికే దేశవ్యాప్తంగా పలు నగరాల్లో ఈవెంట్లు నిర్వహిస్తూ, మీడియా ఇంటర్వ్యూలతో టీమ్ బిజీగా ఉంది.
సినిమా మూడు భాషల్లో విడుదలవుతుండటంతో, తెలుగు, తమిళ, హిందీ భాషల్లో ప్రమోషన్లను గ్రాండ్ గా ప్లాన్ చేశారు. ఈ క్రమంలోనే తండేల్ ప్రమోషన్ ఈవెంట్స్‌కు టాలీవుడ్, కోలీవుడ్, బాలీవుడ్ నుంచి స్టార్ గెస్ట్‌లు రాబోతున్నారని సమాచారం. లేటెస్ట్ అప్డేట్ ప్రకారం, చెన్నైలో తండేల్ తమిళ ట్రైలర్ లాంచ్ ఈవెంట్‌కు కోలీవుడ్ స్టార్ హీరో కార్తీ గెస్ట్‌గా హాజరవ్వడంతో మంచి హైప్ క్రియేట్ అయింది. ఇక ముంబయిలో హిందీ వెర్షన్ ట్రైలర్ లాంచ్ కోసం భారీ ప్రణాళికలు వేస్తున్నారు.
బాలీవుడ్ స్టార్ ఆమీర్ ఖాన్ (Aamir Khan) ప్రత్యేక గెస్ట్‌గా హాజరై హిందీ ట్రైలర్‌ను విడుదల చేయనున్నట్లు టాక్. ఇక తెలుగు వెర్షన్ ప్రీ-రిలీజ్ ఈవెంట్‌ ఫిబ్రవరి 2న గ్రాండ్‌గా జరగనున్నట్లు సమాచారం. ఈ ఈవెంట్‌కు ఐకాన్ స్టార్ అల్లు అర్జున్ (Allu Arjun) ప్రత్యేక గెస్ట్‌గా రాబోతున్నారని టాలీవుడ్ వర్గాల్లో చర్చ జరుగుతోంది. గీతా ఆర్ట్స్ 2 బ్యానర్‌లో తండేల్ నిర్మించబడటంతో పాటు, బన్నీ వాసు (Bunny Vasu) ఈ చిత్రానికి నిర్మాతగా వ్యవహరించటంతో, అల్లు అర్జున్ ఈ ఈవెంట్‌కు హాజరయ్యే అవకాశం ఎక్కువగా కనిపిస్తోంది.
తండేల్ ఇప్పటికే విడుదలైన పాటలు, టీజర్, ట్రైలర్‌తో ప్రేక్షకులలో హైప్‌ను పెంచేసింది. ట్రైలర్ చూస్తుంటే, చందూ మొండేటి మరో విభిన్నమైన కథను తెరపై అందించబోతున్నాడని స్పష్టమవుతోంది. వరుస ఫ్లాపుల అనంతరం నాగ చైతన్యకు ఈ సినిమా బిగ్ హిట్ ను ఇస్తుందో లేదో చూడాలి.
