హీరోయిన్లను రిపీట్ చేస్తున్న స్టార్ హీరోలు

అమ్మ చేతి వంట… ప్రేక్షకులు మెచ్చిన జంట…ఎప్పటికీ బోర్ కొట్టవు. అమ్మ చేతి వంట మళ్ళీ మళ్ళీ తినాలని అనిపిస్తుంది. మెచ్చిన జంటను మరోసారి చూడాలని అనిపిస్తుంది. దర్శకులు, నిర్మాతలకు ఇది తెలుసు కనుకే హిట్ జోడీలను మళ్ళీ మళ్ళీ రిపీట్ చేస్తారు. ఒకసారి జంట కట్టి హిట్ కొట్టిన హీరోయిన్లను రిపీట్ చెయ్యడానికి హీరోలు గ్రీన్ సిగ్నల్ ఇస్తున్నారు. టాలీవుడ్‌లో దాదాపుగా స్టార్ హీరోలంతా ఇప్పటివరకు తమ పక్కన నటించని కొత్త హీరోయిన్లతో సినిమాలు చేస్తున్నారు. ముగ్గురు స్టార్ హీరోలు మాత్రం ఆల్రెడీ నటించిన హీరోయిన్లతో సినిమాలు చేస్తున్నారు. మళ్ళీ యాక్ట్ చేస్తున్న హిట్ జోడీలు ఎవరో ఒకసారి చూద్దాం…!!

అమ్మడూ… వన్స్ ఎగైన్ కుమ్ముడూ!

‘ఖైదీ నంబర్ 150’లో మొదటిసారి మెగాస్టార్ చిరంజీవి, కాజల్ అగర్వాల్ జంటగా నటించారు. అందులో వాళ్ళ జోడీ కెమిస్ట్రీకి కాంప్లిమెంట్స్ వచ్చాయి. పాటల్లో జోడీ బాగుందన్నారు. ‘అమ్మాడూ… లెట్స్ డూ కుమ్ముడూ’ సాంగ్ పెద్ద హిట్ అయ్యింది. ‘ఆచార్య’లో మళ్ళీ ఈ జోడీ నటిస్తోంది. ఈ సినిమాలో ముందు త్రిషను హీరోయిన్‌గా సెలెక్ట్ చేశారు. కొన్ని కారణాల వలన ఆమె తప్పుకోవడంతో కాజల్ సీన్‌లోకి వచ్చింది. సో… హిట్ జోడీని మళ్ళీ చూసే ఛాన్స్ ప్రేక్షకులకు వచ్చింది.

అప్పుడు బలుపు చూపిస్తే… ఇప్పుడు ‘క్రాక్’ చూపిస్తారంట!

మాస్ మహారాజ్ రవితేజ, శ్రుతీ హాసన్ జంటగా నటించిన మొదటి సినిమా ‘బలుపు’. గోపీచంద్ మలినేని దర్శకత్వం వహించారు. థమన్ మ్యూజిక్ అందించాడు. ఆ సినిమా మంచి హిట్ అయ్యింది. ఇప్పుడు సేమ్ కాంబినేషన్ లో ‘క్రాక్’ తెరకెక్కుతుంది. హీరో హీరోయిన్లతో పాటు డైరెక్టర్, మ్యూజిక్ డైరెక్టర్ కూడా సేమ్.

‘వకీల్ సాబ్’తో శ్రుతీ హాసన్!

‘గబ్బర్ సింగ్’తో తెలుగులో శ్రుతీ హాసన్ తొలి హిట్ అందుకుంది. అప్పటికి ఆమె పరాజయాల్లో ఉన్నా పవన్ కల్యాణ్ అవకాశం ఇచ్చాడు. తరవాత ‘కాటమరాయుడు’లో మరోసారి జంటగా నటించారు. ‘వకీల్ సాబ్’లో పవన్ కల్యాణ్ సరసన ఫ్లాష్ బ్యాక్ ఎపిసోడ్‌లో శ్రుతీ హాసన్ నటించనున్నదని టాక్.