హాస్యనటుడిగా అనేక సినిమాల్లో నటించి, నవ్వించిన సునీల్ హీరోగా మారి విజయాలను అందుకున్నారు. అయితే గత కొంతకాలంగా అతను నటించిన సినిమాలు బాక్స్ ఆఫీస్ వద్ద బోల్తా పడుతున్నాయి. దీంతో హాస్య నటుడిగా రీ ఎంట్రీ ఇవ్వడానికి ప్రయత్నిస్తున్నారు. సునీల్ కి పూర్వ వైభవం తీసుకురావాలని త్రివిక్రమ్ శ్రీనివాస్ భావించారు. అజ్ఞాతవాసిలో మంచి రోల్ ఇచ్చారు. అప్పుడు సునీల్ బిజీగా ఉండడం వల్ల నో చెప్పారు. ఈ సారి మాత్రం సునీల్ త్రివిక్రమ్ ఇచ్చిన రోల్ ని మిస్ చేసుకోలేదు. ఎన్టీఆర్ తో త్రివిక్రమ్ తెరకెక్కించనున్న సినిమాలో నటించనున్నారు.
హారిక అండ్ హాసిని క్రియేషన్స్ బ్యానర్లో రాధాకృష్ణ నిర్మిస్తున్న ఈ చిత్రానికి ప్రీ ప్రొడక్షన్ పనులు వేగంగా సాగుతున్నాయి. వచ్చే నెల సెట్స్ మీదకు వెళ్లనున్న ఈ సినిమాలో సునీల్ సెక్యూరిటి ఆఫీసర్ పాత్రలో కనిపించబోతున్నట్లు తెలిసింది. ఆఫీసర్ పాత్ర కాబట్టి సీరియస్ గా ఉందనుకుంటే పొరబాటే. ఇదివరకటి కమెడియన్ సునీల్ ని ఇందులో చూస్తారని టాక్. ఈ మూవీతో పాటు రవితేజ “అమర్ అక్బర్ అంటొనీ” సినిమాలో సునీల్ ఫుల్ లెన్త్ కమెడియన్ రోల్ చేస్తున్నట్లు సమాచారం. మరి ఈ సినిమాలు హాస్యనటుడిగా సునీల్ కి పూర్వవైభవాన్ని తీసుకొస్తాయని ఆశిద్దాం.
