నిన్న హైద్రాబాద్ లో అత్యంత ఘనంగా జరిగిన బాలయ్య స్వర్ణోత్సవ వేడుకలకు చిరంజీవి, వెంకటేష్, శివరాజ్ కుమార్, ఉపేంద్ర, నాని, రానా, విజయ్ దేవరకొండ, మంచు మనోజ్, అల్లరి నరేష్, మంచు విష్ణు, సిద్ధు జొన్నలగడ్డ, అడివి శేష్, గోపీచంద్ వంటి స్టార్ హీరోలతోపాటు.. బాలయ్య సినిమాలకు దర్శకత్వం వహించిన కొందరు దర్శకులు కూడా విచ్చేసారు. ఈవెంట్ అంగరంగా వైభవంగా జరిగింది. ఈవెంట్ కు రాలేకపోయిన రజనీకాంత్ కూడా ట్వీట్ చేసి తన అభినందనలు తెలిపారు. ఇంత ఘనంగా జరిగిన ఈవెంట్ కి ఎన్టీఆర్ హాజరుకాకపోవడం పెద్ద లోటు కాగా.. ఈ ఈవెంట్ లో అక్కినేని కుటుంబ హీరోలు ఒక్కరు కూడా కనిపించకపోవడం చర్చనీయాంశంగా మారింది.
గత కొంత కాలంగా బాలయ్య వర్సెస్ అక్కినేని అంటూ ఇండస్ట్రీ వర్గాలు చర్చించుకుంటున్నాయి. అందుకే బాలయ్య(Balakrishna) తన తండ్రి సీనియర్ ఎన్టీఆర్ జీవితం ఆధారంగా తెరకెక్కిన “ఎన్టీఆర్ కథానాయకుడు మరియు ఎన్టీఆర్ మహానాయకుడు” చిత్రాల్లో అక్కినేని నాగేశ్వరరావుగా సుమంత్ కనిపించినప్పటికీ.. ఆ సినిమా ప్రమోషన్స్ లో ఎక్కడా నాగార్జున పేరు కూడా వినిపించలేదు.
ఇక నిన్న బాలయ్య స్వర్ణోత్సవ వేడుకలు జరిగే సమయానికి “బిగ్ బాస్” సీజన్ 8 మొదలవ్వడంతో అదే కారణమై రాకపోవచ్చు అని కొందరు అంటున్నప్పటికీ.. సదరు షో షూటింగ్ మొన్న రాత్రి జరగడం, ఒకవేళ లైవ్ జరుగుతున్న టైంలో బయట కనిపించకూడదు అనుకున్నప్పటికీ.. కనీసం నాగార్జున కానీ, నాగచైతన్య కానీ ఒక్క ట్వీట్ కూడా వేయకపోవడం అనేది వారి మధ్య పొరపచ్చాలు వచ్చాయనేది నిజం అని అందరూ అనుకునేలా చేసింది.
మరి ఈ గొడవలకి కారణం ఏమిటి అనేది ఇంకా స్పష్టంగా తెలియనప్పటికీ.. ఒకే స్టేజ్ పై ఇండస్ట్రీ సీనియర్ హీరోలందరినీ చూడచ్చనుకున్న అభిమానుల ఆశలు మాత్రం నెరవేరలేదు. మరి నందమూరి అండ్ అక్కినేని మధ్య ఉన్న దూరం ఎప్పడు తగ్గుతుందో చూడాలి!
Home