నార్మల్‌ సీన్స్‌కే బాడీ డబుల్‌ని అదేనండీ డూప్‌ని పెట్టి నడిపిస్తున్న టాలీవుడ్‌ హీరోలు ఉన్న ఈ రోజుల్లో స్టంట్‌ చేసి గిన్నిస్‌ బుక్‌లో చోటు సంపాదించుకున్న స్టార్ హీరో ఎవరు అని అనుకుంటున్నారా? ఉన్నారు.. కానీ మన దగ్గర కాదు. హాలీవుడ్‌ ప్రముఖ కథానాయకుడు టామ్‌ క్రూజ్‌ ఈ ఘనత సాధించాడు. తాజా చిత్రం ‘మిషన్ ఇంపాజిబుల్‌: ది ఫైనల్ రెకనింగ్‌’ సినిమాలో టామ్‌ క్రూజ్‌ చేసిన ఓ స్టంట్‌కుగాను గిన్నిస్‌ వరల్డ్‌ రికార్డులో చోటు సంపాదించాడు.
ప్రస్తుతం దీనికి సంబంధించిన వీడియో కూడా సోషల్‌ మీడియాలో వైరల్‌గా మారింది. ‘మిషన్ ఇంపాజిబుల్‌’ సినిమా చిత్రీకరణలో హెలికాప్టర్‌ నుండి మండుతున్న పారాచూట్‌తో 16 సార్లు జంప్‌ చేసినందుకు ఈ రికార్డు అందుకున్నాడు టామ్‌ క్రూజ్‌. ఈ స్టంట్‌ చేసినప్పుడు ప్రతిసారి మండుతున్న పారాచూట్‌ను సురక్షితంగా ల్యాండింగ్‌ చేశాడు టామ్‌. ఈ నేపథ్యంలో గిన్నిస్‌ వరల్డ్‌ రికార్డు అందుకున్నాడు. ఈ మేరకు గిన్నిస్‌ బుక్‌ ఎడిటర్‌ ఇన్‌ చీఫ్‌ క్రెయిగ్‌ గ్లెండే టామ్‌ క్రూజ్‌ ధైర్యసాహసాలను ప్రశంసించారు కూడా.
టామ్‌ యాక్షన్‌ హీరో.. సినిమా పట్ల అతనికున్న అంకితభావం చూశాక నటుడు ఏం చేయగలడో అనే విషయానికి కొత్త దారి చూపించాడు అని కొనియాడారు. ఈ గిన్నిస్‌ వరల్డ్‌ రికార్డుతో క్రూజ్‌ ధైర్యసాహసాలను గుర్తించడం గౌరవంగా ఉంది అని కూడా అన్నారు. ఇప్పుడు చెపపండి బాడీ డబుల్‌ రోజుల్లో ఇలా నేచురల్‌గా చేయడం పెద్ద విషయమే కదా. దీనికి అవార్డు కచ్చితంగ ఇవ్వొచ్చు అని కచ్చితంగా అనొచ్చు. ఇక ‘మిషన్ ఇంపాజిబుల్‌: ది ఫైనల్ రికనింగ్’ సినిమా విషయానికొస్తే..
మానవాళికి ముప్పు తెచ్చే ఆర్టిఫిషియల్‌ ఇంటెలిజెన్స్‌ ‘ది ఎంటీటీ’ని ఆపడానికి ఈథన్‌ బృందం చేసే ప్రయత్నాలతో ఈ సినిమా రూపొందింది. క్రిస్టోఫర్‌ మెక్‌క్వారీ తెరకెక్కించిన చిత్రమిది. అయితే టామ్‌ క్రూజ్‌కు ఇలాంటి రికార్డులు సృష్టించడం కొత్తేమీ కాదు. గతంలో ఇలాంటి ఫీట్లు చేసి అవార్డులు, రివార్డులు పొందాడు. ఇక ‘మిషన్ ఇంపాజిబుల్‌’ సంగతి చూస్తే.. 1996 ‘మిషన్ ఇంపాజిబుల్‌’ సినిమాలో ఈథన్‌ హంట్‌ పాత్రను తొలిసారి పోషించి.. ఇప్పటివరకు అలరిస్తూనే ఉన్నాడు.
Home