Ustaad Bhagat Singh Review in Telugu: ఉస్తాద్ భగత్ సింగ్ సినిమా రివ్యూ & రేటింగ్!

కథ: సీఎం చంద్రశేఖర్ రావు(కె ఎస్ రవి కుమార్) పై ఊహించని విధంగా ఓ దాడి జరుగుతుంది. అది చేయించింది నల్లా నాగప్ప(పార్తీబన్). చంద్రశేఖర్ రావుని చంపేస్తే సీఎం పదవి వస్తుంది అనేది అతని ఆశ. అయితే నాగప్ప ప్లాన్స్ కి అడ్డుపడతాడు భగత్ సింగ్(పవన్ కళ్యాణ్). నాగప్ప కి భగత్ సింగ్ ఎందుకు అడ్డుపడతాడు? చంద్రశేఖర్ రావుకి ఉస్తాద్ భగత్ సింగ్ కి ఉన్న సంబంధం ఏంటి? మధ్యలో శ్లోక(రాశీ ఖన్నా) ఎవరు.? భగత్ సింగ్ గతమేంటి? లీల(శ్రీలీల) ఎవరు? ఈ విషయాలపై క్లారిటీ రావాలంటే సినిమా చూడాల్సిందే.

నటీనటుల పనితీరు: పవన్ కళ్యాణ్ నటన ఈ మధ్య కాలంలో ఎక్కువ సీరియస్ రోల్స్ చేశాడు. బహుశా పాలిటిక్స్ లో ఉన్నాడనో ఏమో కానీ.. ‘వకీల్ సాబ్’ ‘భీమ్లా నాయక్’ ‘హరిహర వీరమల్లు’ ‘ఓజి’ ఇలా అన్ని సినిమాల్లోనూ పవన్ చేసినవి సీరియస్ రోల్సే. దీంతో పవన్ కళ్యాణ్ ఎనర్జీ, కామెడీ టైమింగ్ అనేవి వాటిలో మిస్ అయ్యాయి. ‘ఉస్తాద్ భగత్ సింగ్’ లో మాత్రం వింటేజ్ పవన్ కళ్యాణ్ కనిపిస్తాడు. ఈ సినిమాకి పవన్ వన్ మెన్ షో చేశాడని చెప్పొచ్చు. ఇంట్రో సీన్ నుండి క్లైమాక్స్ వరకు పవన్ కళ్యాణ్ తన శ్వాగ్ తో మెస్మరైజ్ చేస్తాడు. అలాగే ఇందులో చాలా అందంగా, స్టైలిష్ గా కూడా కనిపించాడు.

కొన్ని చోట్ల తనపై తాను సెటైర్లు వేసుకోవడం అలాగే మహేష్ బాబు వంటి మరో స్టార్ హీరో పాటకి కూడా డాన్స్ చేసి సర్ప్రైజ్ చేశాడు. పవన్ కళ్యాణ్ తర్వాత కె.ఎస్.రవి కుమార్, పార్తీబన్ పాత్రలకి మంచి మార్కులే పడతాయి. రాశీ ఖన్నా ఫస్ట్ హాఫ్ లో ఉంటుంది. ఆమె పాత్రకి పెద్దగా ప్రాముఖ్యత ఏమీ ఉండదు. ఏదో పెట్టాలని పెట్టారు అంతే. సెకండాఫ్ లో శ్రీలీల పాత్ర ఆకట్టుకుంటుంది. పవన్ కళ్యాణ్ ని కొన్ని చోట్ల ఆమె ఇమిటేట్ చేసే విధానానికి ఫ్యాన్స్ విజిల్స్ వేయడం ఖాయం. ఇక సీనియర్ నటి గౌతమి,రావు రమేష్ వంటి పెద్ద నటీనటులు కూడా ఈ సినిమాలో ఉన్నారు. మిగతా నటీనటులు ఓకే ఓకే అనిపిస్తారు.

సాంకేతికవర్గం పనితీరు: ‘ఉస్తాద్ భగత్ సింగ్’ చాలా చిన్న కథ. అలాగే రెగ్యులర్ కథ. స్క్రీన్ ప్లే కూడా ఊహించినట్టే సాగుతుంది. దర్శకుడు హరీష్ శంకర్.. ‘ఇది గొప్ప కథ’ అని ఎప్పుడూ చెప్పుకోలేదు. ఈ మధ్య కాలంలో ఫ్యాన్స్ మిస్సైన పవన్ కళ్యాణ్ ని చూపిస్తానని, అలాగే ఓ మంచి ఎంటర్టైన్మెంట్ సినిమా చూశామనే సంతృప్తిని కామన్ ఆడియన్స్ కి ఇస్తానని’ మాత్రం ప్రమోషన్స్ లో చెప్పుకొచ్చాడు. మొదటి నుండి ఫ్యాన్స్ ని, కామన్ ఆడియన్స్ ని హరీష్ శంకర్ ఇలా ప్రిపేర్ చేయడం మంచిదే అయ్యింది. అనవసరమైన హైప్ లేపకుండా ఉండటం వల్ల.. పెద్దగా అంచనాలు పెట్టుకోకుండా ధియేటర్ కి వచ్చే వాళ్ళు కూడా ఉంటారు. అలా వచ్చిన వాళ్ళని ‘ఉస్తాద్ భగత్ సింగ్’ డిజప్పాయింట్ చేయదు..! ఎంతో కొంత ఎంటర్టైన్ చేసే పంపుతుంది.

కాకపోతే ‘గబ్బర్ సింగ్’ కాంబో కథా అని ఎక్కువగా ఆశించి వచ్చిన వాళ్లకి ‘ఉస్తాద్ భగత్ సింగ్’ కొంచెం ఇబ్బందిగా అనిపించొచ్చు. ఫస్ట్ హాఫ్ రెగ్యులర్ గా స్టార్ట్ అయినా హీరో ఇంట్రో సీన్ డిజైన్ చేసిన తీరు, ప్రీ ఇంటర్వెల్ బ్లాక్ వద్ద వచ్చే ట్విస్టులు ఆకట్టుకుంటాయి.కామెడీ ఎక్కువగా పేలలేదు. అలా అని క్రింజ్ అంటూ విమర్శించే రేంజ్లో ఉండదు. టైం పాస్ చేయిస్తుంది. సెకండాఫ్ అయితే ఫస్ట్ హాఫ్ కంటే కొంచెం బెటర్ గానే ఉంటుంది. ‘తొలిప్రేమ’ లోని ‘ఈ మనసే సే సే’ అనే పాటని ఇందులో రీమిక్స్ చేశారు. అది స్క్రీన్ పై చాలా కలర్ఫుల్ గా ఉంది. దేవి శ్రీ ప్రసాద్ మ్యూజిక్ ఇంప్రెస్ చేస్తుంది. తమన్ బ్యాక్ గ్రౌండ్ స్కోర్ ని ‘ఓజి’ రేంజ్లో ఆశించకూడదు. కానీ బాగానే కుదిరింది. ‘మైత్రి మూవీ మేకర్స్’ వారి నిర్మాణ విలువలకి పేరు పెట్టాల్సిన పని లేదు.

విశ్లేషణ: ‘ఉస్తాద్ భగత్ సింగ్’ మొదటి నుండి ‘తేరీ’ రీమేక్ అంటూ ప్రచారం జరిగింది. ఒక రకంగా అది చాలా మందిని ఇబ్బంది పెట్టింది. దర్శకుడు హరీష్ ప్రమోషన్స్ లో ‘ఇది రీమేక్ కాదు’ అని చెప్పినప్పటికీ.. చాలా మంది నమ్మలేదు. ‘ఉస్తాద్ భగత్ సింగ్’ చూస్తున్నప్పుడు ఫ్యాన్స్ కి దక్కే ఫస్ట్ రిలీఫ్ అదే. అలాగే ‘గబ్బర్ సింగ్’ రేంజ్ అంచనాలు పెట్టుకోకుండా వెళితే.. ‘డీసెంట్ సినిమా చూశామనే’ ఫీలింగ్ ‘ఉస్తాద్ భగత్ సింగ్’ ఇస్తుంది. ‘వింటేజ్ పవన్ కళ్యాణ్ ని చూపిస్తాను’ అంటూ హరీష్ ఇచ్చిన మాటనైతే అతను నిలబెట్టుకున్నాడు.

ఫోకస్ పాయింట్: పవన్ కళ్యాణ్ వన్ మెన్ షో

రేటింగ్: 2.5/5