వరుణ్ తేజ్ నుండి సినిమా వచ్చి రెండేళ్లు అవుతోంది. ఇక సోలో హిట్ వచ్చి అయితే ఏడేళ్లు అవుతోంది. అదే ‘గద్దలకొండ గణేశ్’. ఆ సినిమా వచ్చిన తర్వాత వరుణ్ నుండి ఐదు సినిమాలు వచ్చాయి. అందులో ‘ఎఫ్ 3’ని కాంబో కోటాలో తీసేస్తే.. విజయాలే లేవు. ఈ నేపథ్యంలో ఆయన నుండి రెండేళ్ల తర్వాత వస్తున్న సినిమా కావడంతో ‘కొరియన్ కనకరాజు’ సినిమా మీద మంచి హైపే వచ్చింది. అదే సమయంలో సినిమా కాన్సెప్ట్ ఆసక్తికరంగా ఉండటంతో కుర్రకారుకి ఎక్కేస్తుంది అనుకున్నారు.
కట్ చేస్తే వరుణ్ గాయపడంతో సినిమా వేగం తగ్గిపోయింది. ఇప్పుడు తిరిగి వరుణ్ స్టిక్తో లైన్లోకి రావడంతో సినిమా ప్రచారాన్ని వేగవంతం చేశారు. వచ్చే నెల 7న సినిమాను రిలీజ్ అవుతోంది. ఈ నేపథ్యంలో వరుణ్ తేజ్ మీడియాతో మాట్లాడుతూ కొన్ని ఆసక్తికర వ్యాఖ్యలు చేశారు. రెండేళ్ల విరామం అనంతరం ‘కొరియన్ కనకరాజు’తో ప్రేక్షకుల ముందుకు వస్తున్నాను. సరైన సినిమా కోసమే రెండేళ్లు గ్యాప్ తీసుకున్నాను అని తన గ్యాప్ వెనుక కారణాన్ని వెల్లడించాడు.
తానీ బ్రేక్ నిజంగా కావాలని తీసుకున్నది కాదని, ఎలాంటి పాత్రలు చేయాలని విషయమై క్లారిటీ తెచ్చుకోవడానికి, ఆ దిశగా కథను ఓకే చేసుకోవడానికి రెండేళ్లు పట్టిందని చెప్పారు. ఏదో ఒక సినిమా చేయడం తన ఆలోచన కాదని, కథను బాగా నమ్మితేనే చెయ్యాలనుకున్నాని చెప్పాడు. దర్శకుడు మేర్లపాక గాంధీ ‘కొరియన్ కనకరాజు’ సినిమా కథ చెప్పినప్పుడు కొత్తగా అనిపించిందని, రీఎంట్రీ ఇవ్వడానికి సరైన కథ అనిపించిందని వరుణ్ అన్నాడు.
ఇండో – కొరియన్ హారర్ కామెడీ కాన్సెప్ట్లో ఈ సినిమా రూపొందిందని, ఇలాంటి సినిమా ఇండస్ట్రీలో ఇప్పటివరకు ఎవరూ ట్రై చేయలేదని, అందుకే ఓకే చెప్పానని తెలిపాడు. ఇక తనకు అనంతపురం, రాయలసీమ యాసను నేర్చుకోవడం, కొరియన్ భాషలో పెద్ద డైలాగ్స్ చెప్పడం టాస్క్లా అనిపించిందని చెప్పారు. ఈ పాత్ర కోసం ఫిజికల్గా పెద్ద కష్టం లేకపోయినా డ్యాన్స్, లుక్ కోసం కష్టపడ్డానని చెప్పాడు..
https://www.youtube.com/watch?v=E1ZT4StDFZM
