స్టార్ హీరోలను వెనక్కి నెట్టిన విజయ్ దేవరకొండ

పెళ్లిచూపులు సినిమాలో లేజీ బాయ్ గా కనిపించిన విజయ్ దేవరకొండ.. అర్జున్ రెడ్డి సినిమాలో యాంగ్రీ మ్యాన్ గా కనిపించి.. క్రేజీ హీరో అయ్యారు. ఈ చిత్రం అనేక విమర్శలను ఎదుర్కొని భారీ విజయాన్ని సొంతం చేసుకుంది. ఈ హిట్ విజయ్ కి చేతినిండా అవకాశాలతో పాటు.. ఫాలోయింగ్ ని పెంచింది. ఈ ఫాలోయింగ్ ఎంతగా పెరిగందంటే టాలీవుడ్ హీరోలందరినీ పక్కన పెట్టేంత. 2017 మోస్ట్ డిజైరబుల్ మెన్ పేరిట ఓ జాతీయ పత్రిక నిర్వహించిన పోటీలో రెండవస్థానంలో నిలిచి అందరినీ ఆశ్చర్యపరిచారు. గత ఏడాది 20 వ స్థానంలో ఉన్న విజయ్ ఈ స్థానానికి రావడం వెనుక ప్రధాన కారణం అర్జున్ రెడ్డి. ఇక ఈ పోటీలో గత కొన్నేళ్లుగా టాప్ స్థానాల్లో నిలిచే మహేష్ బాబు నాల్గవ స్థానాన్ని సరిపెట్టుకోగా.. ప్రభాస్ మూడవ స్థానంలో నిలబడ్డారు.

టాప్ టెన్ మోస్ట్ డిజైరబుల్ మెన్ లిస్ట్ లో టాలీవుడ్ హీరోలు రామ్ చరణ్ (5 ), అల్లు అర్జున్ (6 ), ఎన్టీఆర్ (9 ) స్థానం దక్కించుకున్నారు. ఈ స్టార్ హీరోలను వెనక్కి నెట్టిన విజయ్ దేవరకొండ టాక్ ఆఫ్ ది టాలీవుడ్ అయ్యారు. ప్రస్తుతం రాజకీయ నేపథ్యంలో రూపుదిద్దుకుంటున్న నోటా సినిమా షూటింగ్ లో విజయ్ బిజీగా ఉన్నారు. జ్ఞానవేల్ రాజా సమర్పిస్తోన్న ఈ సినిమా ఫస్ట్ లుక్ తోనే అందరి దృష్టిని ఆకర్షించింది. మెహ్రీన్ హీరోయిన్ గా నటిస్తున్న ఈ మూవీ వివరాలు త్వరలో అధికారికంగా ప్రకటించనున్నారు.