అల్లరి నరేశ్‌… పేరులోనే ఈ మధ్య అల్లరి కనిపిస్తోంది. వినోద ప్రాధాన్యమున్న సినిమాలను ఆయన ఈ మధ్య తగ్గిస్తూ వచ్చారు. విజయాలు రావట్లేదనో, లేక ఒకే గాటన కట్టేస్తున్నారనేమో ప్లాన్స్‌ మార్చేస్తున్నారు. ఈ క్రమంలో కాస్త సీరియస్‌ కథలను ఎంచుకుని ‘నేను ఒకే రకం సినిమాలు చేసే వాడిని కాదు’ అని చెప్పకనే చెబుతున్నాడు. అలా చేసినా కూడా విజయాలు అంత ఈజీగా రావడం లేదు. ఈ క్రమంలో ఓ జీవిత కథ చేయడానికి రెడీ అవుతున్నాడని టాలీవుడ్‌ టాక్‌.
అల్లరి నరేష్ ‘నాంది’ సినిమాతో కొత్త ప్ర‌యాణం ప్రారంభించాడు. ఆ తర్వాత ‘ఇట్లు మారేడుమ‌ల్లి నియోజ‌క‌వ‌ర్గం’, ‘ఉగ్రం’ అంటూ కొత్త పంథాలోనే సినిమాలు చేశాడు. ఆ సినిమాలు అనుకున్న స్థాయిలో విజయం సాధించలేదు. పేరు కూడా తెచ్చిపెట్టలేదు. దీంతో ఇప్పుడు మరో రకం సినిమా ఆలోచన చేస్తున్నాడు. అయితే కొత్త పంథా అయిన సీరియస్‌ కథాంశాన్నే ఇప్పుడూ భుజానికెత్తుకోబోతున్నాడు. సుబ్బు ద‌ర్శ‌క‌త్వంలో ఓ సినిమాను దాదాపు ఓకే చేసేశాడని టాక్‌.
సాయిధరమ్‌ తేజ్తో ‘సోలో బ్ర‌తుకే సో బెట‌రు’ అనే సినిమాతో ఆక‌ట్టుకొన్న సుబ్బు ఇటీవల (Allari Naresh) న‌రేష్‌కు ఓ కథ చెప్పారట. రాజేష్ దండా ఈ సినిమాను నిర్మిస్తారట. ఈ సినిమా చిత్రీకరణను త్వ‌ర‌లోనే ప్రారంభిస్తారని సమాచారం. పరిశ్రమ వర్గాల సమాచారం ప్రకారం అయితే ఈ సినిమా తుని ఏరియాలోని ఓ రౌడీ కథ జీవిత కథతో తెరకెక్కిస్తున్నారట. ఆ లెక్కన ఇది కూడా ఓ రకంగా పీరియాడికల్‌ సినిమానే అని చెప్పొచ్చు.
కొన్నేళ్ల క్రితం తుని ప్రాంతంలో బచ్చల మల్లి అనే రౌడీ ఉండేవాడు. ఆ వ్యక్తి జీవితంలో జరిగిన ఆసక్తికర సంఘటనలతోనే ఈ సినిమాను రూపొందిస్తున్నారు అని టాక్‌. అయితే రౌడీ జీవిత కథతో సినిమా ఏంటి? అనే ప్రశ్న మీకూ వచ్చి ఉంటుంది. అయితే బచ్చల మల్లి కథ వేరని, సినిమాలో చూస్తే కానీ తెలియదు అని చెబుతున్నారు. అంతేకాదు ఈ సినిమాను చాలా సహజంగా ఉండేలా చూసుకుంటారట. పేరు కూడా ‘బచ్చల మల్లి’ అనే పెడతున్నారట.
మంగళవారం సినిమా రివ్యూ & రేటింగ్!
స్పార్క్ సినిమా రివ్యూ & రేటింగ్!
సప్త సాగరాలు దాటి సైడ్ బి సినిమా రివ్యూ & రేటింగ్!
