బాలయ్య ఫీట్స్ కి బెంబేలెత్తిపోయిన నయనతార

మూడు సినిమాల్లో కలిసి నటించినాడమే కాక అసలు నయనతార సెకండ్ ఇన్నింగ్స్ కి బీజం వేసిన బాలకృష్ణకు నయనతార ఇప్పుడు పడడం ఏమిటి అని ఆలోచించేస్తున్నారా? ఇక్కడ పడడం అంటే ఆయన డైలాగులకు ఫ్లాట్ అవ్వడమో లేక ఆయన వ్యక్తిత్వానికి సలామ్ పలకడమో కాదు. తాజాగా “జై సింహా” అనే సినిమాలో బాలయ్య సరసన కథానాయికగా నటిస్తోన్న విషయం తెలిసిందే. కె.ఎస్.రవికుమార్ దర్శకత్వంలో రూపొందుతున్న ఈ చిత్రానికి సి.కళ్యాణ్ నిర్మాత.

సినిమాలోని కొన్ని కీలక సన్నివేశాలను వైజాగ్ లో షూట్ చేస్తున్నారు. ఈ షెడ్యూల్ లో భాగంగా బాలకృష్ణ-నయనతారపై ఒక బైక్ సీక్వెన్స్ ను తీశారట. మాంటేజ్ షాట్స్ కోసం పనికొస్తాయని బాలయ్యతో నయనతారను అలా సరదాగా బైక్ మీద ఒక రౌండ్ వేయమన్నారట. బైక్ బరువు ఎక్కువవ్వడంతో టర్నింగ్ లో బ్యాలెన్స్ సడలి బైక్ తోపాటు బాలయ్య-నయనతారలు పడిపోయారట. బాలయ్య ఈజీగా పక్కకి తప్పుకోగా.. నయనతార మాత్రం బైక్ తోపాటు కింద పడిపోయిందట. అదృష్టం బాగుండి బైక్ స్లోగా వెళుతుండడం వల్ల అమ్మడు దెబ్బలు తగలకుండా బయటపడిందట. ఈ విషయం నయనతార అభిమానులకు తెలియడంతో.. “బాలయ్యగారూ మా హీరోయిన్ జాగ్రత్తండి” అంటూ ట్వీట్లు వేశారు.