కొరటాల శివ దర్శకత్వంలో సూపర్ స్టార్ మహేష్ బాబు చేస్తున్న “భరత్ అనే నేను” సినిమా రోజురోజుకి అంచనాలను పెంచుకుంటూ పోతోంది. మొదటగా ఫస్ట్ ఓత్ పేరుతో ముఖ్యమంత్రిగా మహేష్ ప్రమాణం చేస్తున్న వాయిస్ అందరినీ ఆకర్షించింది. ఈ మూవీ టీజర్ “ది విజన్ ఆఫ్ భరత్’ పేరుతో రిలీజ్ అయి రికార్డు సృష్టించింది. ఈ వీడియో 19గంటల్లోనే కోటి డిజిటల్ వ్యూస్‌ని రాబట్టి ఔరా అనిపించింది. ఆ దూకుడు అలాగే కొనసాగుతోంది. ఈ టీజర్ ప్రపంచ వ్యాప్తంగా అత్యధిక మంది లైక్‌ చేసిన టీజర్లలో రెండో స్థానంలో నిలిచింది. ఈ విషయాన్ని చిత్ర వర్గాలు సోషల్‌మీడియా ద్వారా వెల్లడించాయి.
ఇప్పటివరకూ 6,40,000 మంది లైక్‌ చేసినట్లు ప్రకటించాయి. తెలుగు సినిమా ఈ రికార్డు నెలకొల్పడం టాలీవుడ్ వర్గాలను ఆశ్చర్యపరుస్తోంది. ఈ సందర్భంగా “BAN 2nd most liked teaser in world’ హ్యాష్‌ట్యాగ్‌తో ట్రెండ్‌ అవుతోంది. బాలీవుడ్ బ్యూటీ కైరా అద్వానీ హీరోయిన్ గా నటిస్తున్న ఈ చిత్రం దాదాపు షూటింగ్ పూర్తి చేసుకుంది. త్వరలో మిగిలిఉన్న ఒక పాట షూటింగ్ కోసం చిత్ర యూనిట్ స్పెయిన్ వెళ్లనుంది. అప్పట్లోపున డబ్బింగ్ కంప్లీట్ చేసే పనిలో మహేష్ టీమ్ ఉన్నారు. నిర్మాత డి.వి.వి. దానయ్య నిర్మిస్తున్న ఈ సినిమాకి రాక్ స్టార్ దేవీ శ్రీ ప్రసాద్ సంగీతం అందిస్తున్నారు. ఇండస్ట్రీ హిట్ శ్రీమంతుడు కాంబినేషన్లో తెరకెక్కిన ఈ మూవీ ఏప్రిల్‌ 20న రిలీజ్ కానుంది.
