వరుస వాయిదాలు పడుతూ వస్తున్న సినిమాకు కొత్త రిలీజ్ డేట్ చెబితే నమ్మడం కష్టమే. అది పెద్ద హీరో సినిమా అయినా డౌట్గానే ఉంటుంది. ఇప్పుడు ఇలాంటి పరిస్థితుల్లోనే రిలీజ్ డేట్ను అనౌన్స్ చేసుకున్న చిత్రం ‘హరి హర వీరమల్లు’ (Hari Hara Veera Mallu). పవన్ కల్యాణ్ (Pawan Kalyan) హీరోగా తెరకెక్కిన ఈ సినిమాను ఇప్పుడు జులై 24న రిలీజ్ చేస్తామని చిత్రబృందం ప్రకటించింది. గతంలో జూన్ 12న అని చెప్పినా సినిమా ఇంకా పూర్తి కాకపోవడంతో వాయిదా వేసేశారు. అయితే కొత్త డేట్ వెనుక ఆసక్తికర అంశాలు రెండు ఉన్నాయి.
పవన్ కల్యాణ్ (Pawan Kalyan) కెరీర్లో పెద్ద టర్నింగ్ పాయింట్ అంటే ‘తొలి ప్రేమ’ (Tholi Prema) అని చెబుతారు అందరూ. ఎందుకంటే పవన్లో లవర్ బాయ్ యాంగిల్ ప్రేక్షకులకు పరిచయం చేసిన సినిమా అది. ఎన్ని ప్రేమ కథలు వచ్చినా ఆ సినిమాను బీట్ చేయవు అంటే అతిశయోక్తి కాదు. అలాంటి సినిమా జూలై 24నే వచ్చింది. 1998లో ఈ సినిమాను ఏడో నెల 24న రిలీజ్ చేశారు. అలా ఆ రోజు నుండి యూత్లో పవన్ మంచి ఫాలోయింగ్ సంపాదించుకున్నాడు. ఇప్పుడు ఆ డేట్కే ‘హరి హర వీరమల్లు’ తీసుకొస్తున్నారు.
ఇక 2002లో జూలై 24 ‘ఇంద్ర’ (Indra) సినిమా రిలీజయ్యింది. అప్పటి వరకు ఉన్న టాలీవుడ్ రికార్డులన్నింటినీ ఈ సినిమా తుడిచి పెట్టింది. సరైన విజయం దక్కి చాలా ఏళ్లయింది అని చిరంజీవి ఫ్యాన్స్ బాధపడుతున్న రోజులవి. ఆ సమయంలో జులై 24న ‘ఇంద్ర (Indra). ఇంద్ర సేనా రెడ్డి’గా వచ్చి చిరంజీవి అభిమానుల ఆకలి తీర్చాడు. ఇప్పుడు ఆ డేట్కే ‘వీరమల్లు’ వీరవిహారం చేయబోతున్నాడు.
ఇక జులై నెలలో చూసుకుంటే ఇలాంటి విజయాలు మెగా ఫ్యామిలీకి చాలానే కనిపిస్తాయి. ‘తమ్ముడు’ (Thammudu) సినిమా జూలై 15, 1999లో వచ్చింది. రామ్ చరణ్ (Ram Charan) ‘మగధీర’ (Magadheera) సినిమా జూలై 31న వచ్చింది. వరుణ్ తేజ్ (Varun Tej) ‘ఫిదా’ (Fidaa) సినిమా జూలై 21న రావడం గమనార్హం. మరిప్పుడు జులై నెల ఏం చేస్తుందో చూడాలి. అన్నట్లుగా జులైలో వచ్చి డిజాస్టర్ అయిన మెగా సినిమాలూ ఉన్నాయి. అవి ఇప్పుడు అప్రస్తుతం అనుకోండి.
