Balakrishna: నందమూరి అందగాడు సింహం అయితే.. రిజల్ట్‌ ఏంటి?

నందమూరి నట‘సింహం’ అంటూ సింహాన్ని తన బిరుదులోనే ఇముడ్చుకున్నాడు బాలకృష్ణ. అందుకు తగ్గట్టుగా ‘సింహం’ అని వచ్చేలా చాలా సినిమాలు చేశారు. అందులో కెరీర్‌ బెస్ట్‌లు, ఇండస్ట్రీ బెస్ట్‌లు చాలానే వచ్చాయి. తాజాగా ‘వీర సింహా రెడ్డి’ పేరుతో ఈ సంక్రాంతికి బాక్సాఫీసు దగ్గర మాస్‌ జాతర చేయడానికి వస్తున్నాడు. ఈ నేపథ్యంలో ఇప్పటివరకు బాలయ్య ఎత్తిన ‘సింహా’వతారాలు ఏంటి, వాటి సంగతేంటి అనేది చూద్దాం.

* ఎన్టీఆర్‌తో కలసి బాలకృష్ణ 1983లో నటించిన చిత్రం ‘సింహం నవ్వింది’. దాసరి యోగానంద్ డైరెక్ట్ చేసిన ఈ సినిమా బాక్సాఫీస్‌ దగ్గర సరైన ఫలితం అందుకోలేకపోయింది. కానీ ఈ సినిమా ఎన్టీఆర్‌ పాత్ర చిత్రణ నవ్వులు పూయిస్తుంది.

* 1994లో కోదండరామిరెడ్డి దర్శకత్వంలో బాలకృష్ణ హీరోగా నటించిన చిత్రం ‘బొబ్బిలి సింహం’. రోజా, మీనా కథానాయికలుగా నటించిన ఈ సినిమా బాక్సాఫీస్ దగ్గర సూపర్ హిట్‌.

* ఫ్యాక్షన్‌ సినిమాలకు ఊపు తీసుకొచ్చిన చిత్రం ‘సమర సింహా రెడ్డి’. 1999లో వచ్చిన ఈ సినిమాలో బాలయ్యను దర్శకుడు బి.గోపాల్‌ ఫుల్‌ మాస్‌ మోడ్‌లో చూపించారు. బాలకృష్ణ సరసన సిమ్రాన్, అంజలా ఝవేరి, సంఘవి అదరగొట్టారు.

* బాలయ్య – బి.గోపాల్‌ కాంబినేషన్‌లో 2001లో వచ్చిన చిత్రం ‘నరసింహనాయుడు’. ఈ సినిమా విజయం గురించి ఎంత చెప్పానా తక్కువే. 2001లో హైయ్యెస్ట్ గ్రాసర్‌గా నిలిచిన ఈ సినిమాలో సిమ్రాన్, ప్రీతి జింగానియా హీరోయిన్లు.

* సీమ సినిమాలతో ప్రేక్షకుల్ని ఉర్రూతలూగించే బాలయ్య 2002లో ‘సీమ సింహం’గా వచ్చారు. బాలకృష్ణకు నాయికలుగా సిమ్రాన్, రీమా సేన్ నటించారు. జి.రామ్ ప్రసాద్ దర్శకత్వంలో వచ్చిన ఈ సినిమా బాక్సాఫీసు ఫలితం చేదే.

* బాలకృష్ణ రీసెంట్‌ బ్లాక్‌బస్టర్స్‌ లిస్ట్‌లో తొలి స్థానాల్లో ఉండే సినిమా ‘సింహ’. బోయపాటి శ్రీను దర్శకత్వంలో 2010లో వచ్చిన ఈ సినిమాలో బాలయ్య సరసన నయనతార, నమిత, స్నేహ ఉల్లాల్‌ నటించారు.

* తమిళంలో మంచి విజయం అందుకున్న ‘సామి’ సినిమాను తెలుగులో ‘లక్ష్మీ నరసింహ’గా తీసుకొచ్చారు బాలయ్య. 2014లో వచ్చిన ఈ సినిమాలో అశిన్‌ కథానాయికగా నటించింది. మాతృకలో విక్రమ్‌ నటించాడు.

* తెలుగు సింహాలతోపాటు బాలయ్య ఇంగ్లిష్‌ సింహంలో కూడా నటించారు. 2015లో ‘లయన్‌’ పేరుతో ఓ సినిమా చేశారు. బాలయ్య సరసన త్రిష, రాధిక ఆప్టే నటించారు. ఈ సినిమా బాక్సాఫీసు దగ్గర ఆశించిన విజయం అందుకోలేదు.

* కె.యస్.రవికుమార్ దర్శకత్వంలో ‘జై సింహా’ టైటిల్‌తో 2018లో బాలయ్య ఓ సినిమా చేసారు. బాలయ్య సరసన ఈ సినిమాలో నయనతార కథానాయికగా నటించింది.

* గోపీచంద్‌ మలినేని దర్శకత్వంలో బాలయ్య ‘వీర సింహా రెడ్డి’ సినిమా చేశాడు. ఈ సినిమాను జనవరి 12న విడుదల చేస్తున్నారు. ఈ సినిమాలో శ్రుతి హాసన్‌ కథానాయిక. మైత్రీ మూవీ మేకర్స్‌ నిర్మించింది.