యాంకర్స్ గా దుమ్మురేపడానికి రెడీ..!

December 30, 2020 / 08:19 PM ISTByFilmy Focus

Join Us

వెండితెరపై హీరోలు బుల్లితెరపై యాంకరింగ్ చేస్తే ఆ కిక్కే వేరుగా ఉంటుంది. బిగ్ బాస్ షోతో జూనియర్ ఎన్టీఆర్ చేసిన యాంకరింగ్ ఇప్పటికీ ఫ్యాన్స్ కి అలాగే గుర్తుండిపోయింది. అలాగే, హీరో జగపతి బాబు కూడా గతంలో రాజు రాణి జాకీ అనే కపుల్ గేమ్ షోని లీడ్ చేశాడు. అందరితో శభాష్ అనిపించుకున్నారు. వీరిద్దరే కాదు, నాని, నాగార్జున, మెగాస్టార్ చిరంజీవి, నవదీప్ , సాయికుమార్, అలీ ఇలా చాలామంది హీరోలు , యాక్టర్స్ అందరూ యాంకర్స్ అవతారమెత్తినవాళ్లే.

అయితే, ఇప్పుడు ఈ మేటర్ ఎందుకంటే, టాలీవుడ్ లో హీరోగా ప్రస్తుతం విలన్ గా ఒక వెలుగు వెలుగుతున్న జగ్గుభాయ్.., త్వరలోనే ఒక రియాలిటీ షోకి యాంకర్ గా మారనున్నాడు. గతంలో జగపతిబాబు చేసిన ‘రాజు రాణి జాకీ’ టీవి షో మంచి హిట్ అయ్యింది. కానీ ఆ తర్వాత జగపతిబాబు మరోసారి బుల్లితెరపై యాంకరింగ్ చేయలేదు. ఇప్పుడు ఒక ప్రముఖ ఛానల్ రియాలిటీ షో కోస్ జగ్గూభాయ్ ని ఒప్పించి భారీ రెమ్యూనిరేషన్ ఇచ్చినట్లుగా తెలుస్తోంది.

అంతేకాదు, ప్రజెంట్ చేతినిండా సినిమాలతో జగపతిబాబు ఫుల్ బిజీగా ఉన్నాడు. తెలుగులోనే కాకుండా పలు భాషల్లో సైతం విలన్ గా నటిస్తూ మెప్పిస్తున్నాడు. ఈ టైమ్ లో చేస్తున్న రియాలిటీ షో కాబట్టి ఫ్యాన్స్ లో ఉత్సాహం పెరిగింది. మరోవైపు తారక్ కూడా ఒక ఫేమస్ రియాలిటీ షోని తెలుగులో చేసేందుకు రెడీగా ఉన్నాడట. అంతేకాదు, ఇందులో సామాన్యులు పాలుపంచుకోబోతున్నారని అంటున్నారు. దీనికి కూడా తారక్ భారీగా రెమ్యూనిరేషన్ తీసుకుంటున్నాడని టాక్ వినిపిస్తోంది. ఇప్పుడు ఇద్దరూ చేయబోయే ఈ షోలపై సోషల్ మీడియాలో ఆసక్తిరేగింది.