Maruthi: డైరెక్టర్ మారుతి.. అడ్రస్ చెప్పి అనవసర తలనొప్పి కొని తెచ్చుకున్నారా? – Filmy Focus

సినిమా ఇండస్ట్రీలో ఒక్కోసారి అతి విశ్వాసం ఇబ్బందుల్లోకి నెట్టేస్తుంది. ‘ది రాజా సాబ్’ మూవీ ప్రీ రిలీజ్ ఈవెంట్‌లో దర్శకుడు మారుతి చేసిన వ్యాఖ్యలు ఇప్పుడు ఆయనకే చుట్టుముట్టాయి. సినిమా రిజల్ట్ తేడా కొడితే కొండాపూర్‌లోని తన విల్లా నంబర్ 16కి వచ్చి నిలదీయమని లైవ్‌లోనే తన అడ్రస్ చెప్పడం అప్పట్లో హాట్ టాపిక్‌గా మారింది. అయితే పాన్ ఇండియా స్టార్ ప్రభాస్ నటించిన ఈ చిత్రానికి బాక్సాఫీస్ వద్ద మిశ్రమ స్పందన రావడంతో, ఇప్పుడు ఆ అడ్రస్ లీక్ మారుతికి కొత్త చిక్కులు తెచ్చిపెట్టింది.

Maruthi

గత కొన్ని రోజులుగా మారుతి నివసిస్తున్న అపార్ట్‌మెంట్‌కు గుర్తు తెలియని వ్యక్తుల నుండి భారీగా పార్సిళ్లు, ఉత్తరాలు వస్తున్నట్లు సమాచారం. కొండాపూర్‌లోని సదరు విల్లా అడ్రస్‌కు రోజుకు పదుల సంఖ్యలో కొరియర్లు వస్తుండటంతో అక్కడ భద్రతా సిబ్బంది ఉక్కిరిబిక్కిరి అవుతున్నారట. అభిమానులు లేదా నెటిజన్లు కావాలనే రకరకాల ఆర్డర్లు ఇచ్చి మారుతి అడ్రస్‌కు పంపిస్తున్నారా అనే అనుమానాలు వ్యక్తమవుతున్నాయి. దీంతో అపార్ట్‌మెంట్‌లో ఉంటున్న మిగతా కుటుంబాలు కూడా ఈ హడావుడి చూసి అసౌకర్యానికి గురవుతున్నట్లు తెలుస్తోంది.

కేవలం ఒక ఎమోషనల్ స్పీచ్‌లో భాగంగా తన నివాస వివరాలను బయటపెట్టిన మారుతి, దానివల్ల ఇంతటి భద్రతా పరమైన సమస్యలు వస్తాయని ఊహించలేకపోయారు. ఇప్పుడు వస్తున్న పార్సిళ్లలో ఏముందో తెలియక సెక్యూరిటీ టీమ్ ప్రతి బాక్స్‌ను క్షుణ్ణంగా తనిఖీ చేస్తోంది. ఏదైనా అనుమానాస్పదంగా కనిపిస్తే వెంటనే నిర్వాహకులకు సమాచారం అందిస్తున్నారు. స్టేజ్ మీద ఆవేశంలోనో, నమ్మకంతోనో చెప్పిన మాట ఇప్పుడు వ్యక్తిగత గోప్యతకు భంగం కలిగించేలా మారడం మారుతి సన్నిహితులను ఆందోళనకు గురిచేస్తోంది.

ఈ గందరగోళంపై మారుతి ఇంకా అధికారికంగా స్పందించలేదు. సెలబ్రిటీలు తమ పర్సనల్ లైఫ్ గురించి పబ్లిక్ లో మాట్లాడేటప్పుడు ఎంత జాగ్రత్తగా ఉండాలో ఈ ఘటన ఒక గుణపాఠంలా మారింది. ప్రస్తుతం ఈ పార్సిళ్ల గోల నుండి బయటపడటానికి ఆయన తన సెక్యూరిటీని మరింత పెంచుకున్నట్లు సమాచారం. మరి ఈ అడ్రస్ లీక్ ఇష్యూ ఎక్కడి వరకు వెళ్తుందో చూడాలి.