ఎన్టీఆర్ బయోపిక్ లో చంద్రబాబుని హీరోని చేస్తే ఒప్పుకోనన్న లక్ష్మి పార్వతి

తన తండ్రి మహానటుడు నందమూరి తారక రామారావు జీవితం ఆధారంగా సినిమా తీస్తానని ఎన్టీఆర్ కుమారుడు, టీడీపీ ఎమ్మెల్యే నందమూరి బాలకృష్ణ ప్రకటించి 24 గంటలు కూడా గడవకముందే దానిపై వివాదం మొదలయింది. ఎన్టీఆర్ బయోపిక్ లో ఆయన అల్లుడు, నేటి సీఎం నారా చంద్రబాబు నాయుడును హీరోగా చూపిస్తే న్యాయపోరాటం చేస్తానని ఎన్టీఆర్ రెండో భార్య లక్ష్మీపార్వతి హెచ్చరించారు. తన భర్త జీవిత చరిత్ర ఆధారంగా తీసే సినిమాలో వాస్తవాలు వక్రీకరిస్తే మౌనంగా ఉండనని ఆమె స్పష్టం చేశారు. నిన్న ఈ సినిమా వివరాలను బాలయ్య వెల్లడిస్తూ ఎన్టీఆర్ పాత్రలో తానే నటిస్తానని చెప్పారు.

తండ్రి గురించి తనకు కూడా కొన్ని విషయాలు తెలియవని, ఆయనపై సినిమా తీయాలంటే మామూలు విషయం కాదని బాలకృష్ణ అన్నారు. మహానటుడు గురించి అన్ని విషయాలు తెలుసుకుని సినిమాగా మలుస్తామని వివరించారు. అయితే ఈ సినిమాలో 1995లో టీడీపీలో జరిగిన పరిణామాలను ఎలా చూపిస్తారనే దానిపై లక్ష్మీపార్వతి అనుమానాలు వ్యక్తం చేస్తున్నారు. సొంత మామను వెన్నుపోటు పొడిచి చంద్రబాబు ముఖ్యమంత్రి పీఠాన్ని అధిష్టించిన విషయాన్ని ఆమె గుర్తు చేస్తున్నారు. జరిగినది జరిగినట్లుగా చూపించాలని కోరారు.

Also, do SUBSCRIBE to our YouTube channel to get latest Tollywood updates.