మామూలుగా సంక్రాంతి, దసరా, దీపావళి, క్రిస్మస్, రంజాన్ పండగ రోజులు ఎప్పుడొస్తాయా అని అందరూ ఎదురుచూస్తుంటారు. కానీ.. సినిమా అభిమానులు మాత్రం వారంలో శుక్రవారం ఎప్పుడొస్తుందా అని ఎదురుచూస్తుంటారు. ప్రతి శుక్రవారం రెండుమూడు సినిమాలు విడుదలవుతూనే ఉంటాయి. అయితే.. చెప్పుకోదగ్గవి మాత్రం మహా అయితే నెలకో రెండో మూడో విడుదలవుతుంటాయి. కానీ.. ఆశ్చర్యకరంగా ఆగస్ట్-సెప్టెంబర్ నెలలో అన్నీ బడా సినిమాలే ఉన్నాయి. ఇది నిజంగా సినిమా అభిమానులకు శుభవార్తే.
ఆల్రెడీ గతవారం “నేనే రాజు నేనే మంత్రి, లై, జయ జానకి నాయక” వంటి మూడు తెలుగు సినిమాలు ప్రేక్షకుల్ని అలరించగా.. వచ్చేవారం తాప్సీ నటించిన “ఆనందో బ్రహ్మ” విడుదలవుతోంది. ఆ తర్వాత ఆగస్ట్ 24న ధనుష్ నటించిన “విఐపి 2”, అజిత్ నటించిన “వివేగం” వంటి డబ్బింగ్ సినిమాలతోపాటు తెలుగు సినిమా “ఓయ్ నిన్నే” అనే చిన్న సినిమా విడుదలవుతోంది. అలాగే.. ఆగస్ట్ 25న విజయ్ దేవరకొండ మోస్ట్ హైప్డ్ మూవీ “అర్జున్ రెడ్డి” కూడా విడుదలకానుంది. ఈ సినిమాల అనంతరం నందమూరి నటసింహం బాలయ్యబాబు నటించిన “పైసా వసూల్” సెప్టెంబర్ 1న విడుదలకానుంది. ఈ సినిమాపై భారీ అంచనాలున్నాయి. ఆ తర్వాతివారంలో మళ్ళీ సెప్టెంబర్ 8న నాగచైతన్య “యుద్ధం శరణం”, మంచు మనోజ్ “ఒక్కడు మిగిలాడు” విడుదలవుతున్నాయి. సెప్టెంబర్ 14న సాయిధరమ్ తేజ్ నటించిన “జవాన్” విడుదలవుతుండగా.. సరిగ్గా సెప్టెంబర్ 21న జూనియర్ ఎన్టీయార్ “జై లవకుశ”తో ట్రిపుల్ రోల్ లో బాక్సాఫీసుపై దండెత్తనున్నాడు. ఇక ఆ తర్వాత మన సూపర్ స్టార్ మహేష్ బాబు “స్పైడర్” సినిమాతో సూపర్ స్పైగా అలరించేందుకు సెప్టెంబర్ 27న వచ్చేందుకు సన్నద్ధమవుతున్నాడు. ఇలా వరుసబెట్టి స్టార్ హీరోలందరూ సూపర్ క్రేజీ ప్రోజెక్ట్స్ తో ప్రేక్షకుల్ని అలరించి బాక్సాఫీసు వద్ద సరికొత్త రికార్డులు సృష్టించేందుకు సన్నద్ధమవుతుండగా.. ప్రేక్షకులేమో సదరు సినిమాలు చూసి సంతోషించడానికి సిద్ధంగా ఉన్నారు!
Also, do SUBSCRIBE to our YouTube channel to get latest Tollywood updates.
