NTRxTrivikram: ఎన్టీఆర్‌ – త్రివిక్రమ్‌ సినిమా మీద మొదలైన పంచాయితీ.. మొదలైన వార్నింగ్‌లు

ప్రచారం కోసం చేసిన ప్రయత్నమో (ఈ మధ్య కొంతమంది అలా చేస్తున్నారులెండి), లేక తెలిసిన సమాచారంతో రాశారో కానీ.. ఎన్టీఆర్‌ – త్రివిక్రమ్‌ సినిమా అనౌన్స్‌మెంట్‌ సమయంలో నాగవంశీ చేసిన ఓ పోస్టు ఇప్పుడు పెద్ద ఎత్తున చర్చకు దారి తీస్తోంది. ఆయన రాసిన పోస్టులో సుబ్రహ్మణ్య స్వామి ఉత్తరాదికి చెందిన దేవుడు అనే అర్థం వచ్చేలా రాశారు. ఆ పోస్ట్‌ వేసిన రోజే కొంతమంది నెటిజన్లు ఈ విషయాన్ని ఎత్తి చూపారు. ఫిల్మీ ఫోకస్‌లో ఇదే విషయం ప్రస్తావించాం.

NTRxTrivikram

ఇప్పుడు ఈ విషయంలో తమిళనాడు నుండి మాటల తూటాలు మొదలయ్యాయి. తమిళనాడులోని నామ్‌ తమిళర్‌ కట్చి (ఎన్టీకే) ప్రధాన సమన్వయకర్త, సినీ దర్శకుడు, నటుడు సీమాన్‌ ఆగ్రహం వ్యక్తం చేశారు. ఈ మేరకు ఓ ప్రకటన విడుదల చేశారు. కార్తికేయుడు తమిళుల దైవమని, ఆయన ఉత్తరాదికి చెందిన రాష్ట్రంలో జన్మించారనే భావన కలిగించేలా సినిమాను తెరకెక్కిస్తే తీవ్ర పరిణామాలు ఎదుర్కోవాల్సి ఉంటుందని ఘాటుగా హెచ్చరించారు.

క్రియేటివిటీ ముసుగులో అవగాహన లేకుండా.. చారిత్రక వక్రీకరణలు చేసి నమ్మించే ప్రయత్నం చేయడం ఖండిస్తున్నాం. తమిళుల పురాతన సంస్కృతి, జీవన విధానంతో పెనవేసుకున్న సుబ్రహ్మణ్యస్వామి తమిళుల అతి ప్రాచీన ఆది దైవమన్నారు. సుబ్రహ్మణ్యస్వామి ఉత్తరాదిలో జన్మించారనే కట్టుకథలను పుట్టించి వాటిని కళ పేరిట వక్రీకరించే ప్రయత్నాన్ని చిత్రబృందం వెంటనే మానుకోవాలని సూచించారు. తమ మాట వినకుండా ఇదే భావజాలంతో సినిమాను తీసి విడుదల చేస్తే సహించం అని చెప్పారు.

అలా తెరకెక్కిన సినిమాను తమిళనాడులోని ఏ థియేటరులోనూ ప్రదర్శించకుండా తమ పార్టీ చూస్తుందని హెచ్చరించారు. అంతేకాదు ఈ సినిమా తమిళనాడులో ప్రదర్శించడానికి అనుమతించకూడదని రాష్ట్ర ప్రభుత్వాన్ని డిమాండ్‌ కూడా చేశారు. ఈ నేపథ్యంలో సినిమా టీమ్‌ నుండి ఎలాంటి రెస్పాన్స్‌ వస్తుందో చూడాలి.

హీరోలను సాకుగా చూపిస్తున్నారు.. అసలు సమస్య ఇంకొకటి ఉంది?