‘వారసుడు’ / ‘వరిసు’ (Varisu) సినిమా విడుదలకు ముందు ప్రచారం జరిగినన్ని రోజులు.. ఆ తర్వాత కొన్ని రోజులు ఎక్కువగా ట్రెండింగ్‌లో నిలిచిన అంశం.. విజయ్ (Vijay Thalapathy) – ప్రచారం. తన సినిమా ప్రచారం కోసం విజయ్ తెలుగు రాష్ట్రాలకు వస్తాడా? రాడా? అనేది ఆ చర్చ సారాంశం. తెలుగు, తమిళంలో ఒకేసారి తెరకెక్కుతున్న సినిమా అని చెప్పి మరీ ఆ సినిమా తీసుకొచ్చారు. అయితే తర్వాత అది తెలుగు డబ్బింగ్‌ అని తేలింది అనుకోండి.
సంక్రాంతికి పెద్ద హీరోల మధ్యలో బరిలోకి దిగిన ఈ సినిమాలో ఆశించిన ఫలితం ఇవ్వలేదు. అయితే బాగా ఆడింది, వందల కోట్లు వచ్చింది అని టీమ్‌ చెప్పింది అనుకోండి. ఆ విషయం వదిలేస్తే.. ఆ సినిమా (The GOAT) ప్రచారానికి విజయ్‌ను నిర్మాత దిల్‌ రాజు తీసుకొస్తారని ఆశించిన అభిమానులు, ప్రేక్షకులకు నిరాశే ఎదురైంది. విజయ్ ఎదురొచ్చి కాఫీ ఇచ్చి మరీ గౌరవంగా చూశారు అంటూ దిల్‌ రాజు (Dil Raju) ఎంత పొగిడినా విజయ్ రాలేదు అనే మాట అలానే ఉండిపోయింది.
అయినా, అప్పుడెప్పుడో జరిగిన విషయం ఇప్పుడెందుకు డిస్కషన్‌లోకి అనుకుంటున్నారా? ఎందుకంటే ఇప్పుడు విజయ్ సినిమా మరొకటి విడుదలవుతోంది. సెప్టెంబరు 5న ‘ది గోట్‌’ను (The Greatest of All Time ) తమిళం, తెలుగులో విడుదల చేస్తున్నారు. ఈ సినిమాను తెలుగు రాష్ట్రాల్లో మైత్రీ మూవీ మేకర్స్‌ విడుదల చేస్తోంది. దీంతో మైత్రీ వాళ్లైనా విజయ్‌ను ప్రచారానికి తీసుకురాగలరా అనే ప్రశ్నలు వినిపిస్తున్నాయి. ‘ది గోట్‌’ టీజర్, ట్రైలర్ బాగున్నాయి..
అయితే కాస్త నెగిటివిటీ కూడా ఉంది. మరోవైపు తెలుగులో సినిమాకు ఇంకా అంత బజ్‌ రాలేదు. దీంతో విజయ్ వస్తే ఆ బజ్‌ వచ్చేస్తుంది అని ఇండస్ట్రీలో అంటున్నారు. మరి ఈ విషయంలో మైత్రీ ప్లానింగ్‌ ఎలా ఉందో చూడాలి. అలాగే విజయ్ ఈసారైనా నిర్మాత‌ల మాట వింటాడా? లేదో చూడాలి. వెంకట్‌ ప్రభు (Venkat Prabhu) తెరకెక్కిస్తున్న ‘ది గోట్‌’ సినిమాలో మీనాక్షి చౌదరి (Meenakshi Chaudhary) హీరోయిన్‌. ఇందులో ఇద్దరు విజయ్‌లు కనిపిస్తాడు. కుర్ర విజయ్ పాత్ర కోసం డీఏజింగ్‌ టెక్నాలజీ వాడారు.
