గీతా ఆర్ట్స్ బ్యానర్లో మెగా పవర్ స్టార్ రామ్ చరణ్ తేజ్ నటిస్తున్న “ధ్రువ” సినిమా ఫస్ట్ లుక్ ఆగస్టు 15 న రిలీజ్ కానుంది. ఈ విషయాన్ని చెర్రీ స్వయంగా వెల్లడించారు. గురువారం సాయంత్రం ఆయన ఫేసుబుక్ వేదికపై అభిమానులతో ఇంటరాక్ట్ అయ్యారు. ఇందులో అనేక ఆసక్తికరమైన విషయాలను వెల్లడించారు. ధ్రువ కోసం తనతో పాటు సురేందర్ రెడ్డి టీమ్ మొత్తం బాగా కష్టపడుతోందని, ఈ సినిమా అక్టోబర్ మొదటి వారంలో విడుదల చేసేందుకు శ్రమిస్తున్నామని తెలిపారు.
ధ్రువ తర్వాత సుకుమార్ దర్శకత్వంలో నటించనున్నట్లు స్పష్టం చేశారు. రామ్ చరణ్ తన తండ్రి మెగాస్టార్ 150 వ సినిమా గురించి మాట్లాడుతూ .. ఆ చిత్రానికి కత్తిలాంటోడు కాకుండా .. వేరే మంచి టైటిల్ పెట్టే ఆలోచన ఉందన్నారు. సినిమా పేరును మెగాస్టార్ వచ్చే నెలలో రివీల్ చేస్తారని చెప్పారు. సంక్రాంతికి విడుదల కానున్న చిరు మూవీలో కుటుంబ సభ్యులు ఎవరూ నటించడం లేదని క్లారిటీ ఇచ్చారు. బాబాయ్ పవన్ కళ్యాణ్ తో కలిసి ఫిల్మ్ చేసేందుకు తాను కూడా ఆసక్తిగా ఉన్నట్లు, మంచి కథ వస్తే తప్పకుండా చేస్తామని మాట ఇచ్చారు.
సమాజానికి ఉపయోగ పడే పనులను చేసేందుకు “మెగా ఫ్యాన్ ప్రాజెక్ట్”ను త్వరలోనే ప్రారంభించనున్నట్లు చెర్రీ వెల్లడించారు. ఇందులో స్వచ్ఛ భారత్ లా వీధులను శుభ్రం చేయడం, నీటి కష్టాలను తీర్చడం వంటి ఎన్నో పనులు ఉంటాయని వివరించారు.
Home