తెలుగు ప్రజలు ఇచ్చే టికెట్ డబ్బులు కావాలి కానీ తెలుగులో పేరు పెట్టరు అంటూ గత కొన్ని రోజులుగా పెద్ద ఎత్తున చర్చ జరిగింది. ఏకంగా ఆ డబ్బింగ్ సినిమాను తెలుగులో రిలీజ్ చేస్తున్న నిర్మాతలు ప్రెస్ మీట్ పెట్టి.. ‘ఈ కారణంగానే మేం తెలుగు పేరు పెట్టలేదు’ అని చెప్పే పరిస్థితి వచ్చింది. ఈ విషయాన్ని పరిశీలించారో లేక మరో కారణమో కానీ ‘వార్ 2’ సినిమా పేరు కూడా మారుతోంది అని అంటున్నారు.
హృతిక్ రోషన్ (Hrithik Roshan) – తారక్ (Jr NTR) ప్రధాన పాత్రల్లో తెరకెక్కుతున్న చిత్రం ‘వార్ 2’. హృతిక్ – టైగర్ ష్రాఫ్ ప్రధాన పాత్రలతో తెరకెక్కి భారీ విజయం అందుకున్న ‘వార్’ సినిమాకు ఇది సీక్వెల్. ఈ సినిమా షూటింగ్ కొత్త షెడ్యూల్ వచ్చే నెలలో ప్రారంభమవుతుంది అని చెబుతున్నారు. తాజాగా ఈ సినిమాకు సంబంధించి ఓ విషయం బయటకు వచ్చింది అని చెబుతున్నారు. కొత్త పుకార్ల బట్టి చూస్తే.. ఈ సినిమా పేరును మారుస్తున్నారట.
అయితే మొత్తం పేరును మార్చకుండా.. ఇంగ్లిష్లో ఉన్న టైటిల్కు తెలుగు పేరును యాడ్ చేసి పెడుతున్నారట. అన్నీ అనుకున్నట్లుగా జరిగితే సినిమాకు ‘వార్ 2 – యుద్ధభూమి’ అని పెడతారు అని చెబుతున్నారు. నిజానికి ఈ పేరు ఇప్పుడు అనుకున్నది కాదు.. సినిమా ప్రారంభంలోనే అనుకున్నారు అని తెలుస్తోంది. ఈ క్రమంలో ‘వార్ 2’ సినిమా ప్రారంభించిన కొత్త రోజుల్లో హృతిక్ ఓ ట్వీటులో ‘యుద్ధ భూమి’ అని ప్రస్తావించాడు.
వచ్చే ఏడాది ఆగస్ట్ 15న సినిమాను రిలీజ్ చేస్తారు అని చెబుతున్న సినిమాను శరవేగంగా పూర్తి చేయాలని టీమ్ ప్లాన్ చేస్తోందట. నవంబరులో మొదలయ్యే షెడ్యూల్లో కీలక సన్నివేశాలు తెరకెక్కిస్తారట. ఈ సినిమాకు షూటింగ్ ఎంత కాలం పడుతుందో.. పోస్ట్ ప్రొడక్షన్కి కూడా అంతే సమయం పడుతుంది అని అంటున్నారు. మరి ‘వార్ 2’.. యుద్ధ భూమిలో ఎలాంటి ఫలితం అందుకుంటుందో చూడాలి.
