ఆగస్టు 22 న కత్తిలాంటోడు టీజర్ ?

“జస్ట్ టైం గ్యాప్ అంతే, టైమింగ్ లో గ్యాప్ ఉండదు” అని బ్రూస్లీ సినిమాలో మెగాస్టార్ చిరంజీవి చెప్పినట్లే చేస్తున్నారు. ఆయన 150 వ చిత్రం కత్తిలాంటోడు షూటింగ్ గత గురువారం మొదలైన సంగతి తెలిసిందే. సినిమా కాస్త ఆలస్యంగా సెట్స్ మీదకు వెళ్లినా.. టీజర్ ని మాత్రం చాలా త్వరగా ఇవ్వాలని భావిస్తున్నారు. తన సినిమా కోసం తొమ్మిదేళ్లుగా ఎదురు చూస్తున్న అభిమానుల కోసం ఈ నిర్ణయం తీసుకున్నారు.

చిరు పుట్టిన రోజు ఆగస్టు 22 న కత్తిలాంటోడు తొలి టీజర్ ను విడుదల చేయాలని చిత్ర బృందం ప్లాన్ చేస్తోంది. కొణెదల ప్రొడక్షన్, లైకా ప్రొడక్షన్ సంయుక్తంగా నిర్మిస్తున్న ఈ చిత్రాన్ని వి.వి.వినాయక్ తెరకెక్కిస్తున్నారు. ఇందులో రైతుల కోసం పోరాడే వ్యక్తిగా మెగాస్టార్ కనిపించనున్నారు. హైదరాబాద్ లోని శివార్లలో డే అండ్ నైట్ కత్తిలాంటోడు షూటింగ్ జరుగుతోంది. తొలి షెడ్యూల్ లో వినాయక్ చిరు పై కొన్ని యాక్షన్ సన్నివేశాలను చిత్రీకరిస్తున్నారు. ఓ వైపు షూటింగ్ జరుగుతుండగానే .. మరో వైపు ఎడిటింగ్ ను వేగంగా చేస్తున్నారు.

తొలి టీజర్ సినిమాపై అంచనాలు పెంచేదిగా ఉండాలని చిత్ర యూనిట్ శ్రమిస్తోంది. ఇంకా ప్రధాన కథానాయిక ఖరారు కాని ఈ సినిమాలో సరైనోడు లో ఎంఎల్ ఏ గా ఆకట్టుకున్నకేథరిన్ ఓ పాటలో చిరుతో కలిసి డ్యాన్స్ వేయనుంది. రాక్ స్టార్ దేవిశ్రీ ప్రసాద్ మాస్ ప్రజలను ఉర్రూతలాడించే ట్యూన్స్ ఇచ్చే పనిలో నిమగ్న మై ఉన్నారు. ఈ చిత్రం సంక్రాంతికి రిలీజ్ కానుంది.