కన్నడ సినిమా అయినప్పటికీ ‘కె.జి.ఎఫ్’ సృష్టించిన ప్రభంజనం అంతా ఇంతా కాదు. ఈ చిత్రం హీరో యష్ కూడా ఇండియన్ లెవెల్లో క్రేజ్ సంపాదించుకున్నాడు. కన్నడ, తెలుగు,తమిళ, హిందీ భాషల్లో మొత్తం కలిపి 200 కోట్లకు పైగా వసూళ్ళను సాధించింది ఈ చిత్రం. ఇక ఈ చిత్రానికి సీక్వెల్ కూడా రూపొందుతున్న సంగతి తెలిసిందే. మొదటి భాగాన్ని ‘కె.జి.ఎఫ్ చాప్టర్1’… రెండో భాగాన్ని ‘కేజీఎఫ్ చాప్టర్ 2’ గా ప్రశాంత్ నీల్ తెరకెక్కిస్తున్నాడు. ఈ చిత్రంపై కూడా భారీ అంచనాలు నెలకొన్నాయి.
ఆ అంచనాలకి తగ్గట్టుగానే… ‘కె.జి.ఎఫ్ చాప్టర్ 2’ ను భారీ బడ్జెట్ తో తెరకెక్కిస్తున్నారు చిత్ర నిర్మాతలు. ఇదిలా ఉండగా… తాజాగా ఈ చిత్రానికి కోర్టు పెద్ద షాక్ ఇచ్చింది. విషయంలోకి వెళితే… ఈ చిత్రం షూటింగ్ ప్రస్తుతం కోలార్ ఫీల్డ్స్లోని సైనైడ్ హిల్స్లో జరుగుతుండగా… ‘షూటింగ్ కారణంగా అక్కడి పర్యావరణానికి హానికలుగుతోందంటూ’ శ్రీనివాస్ అనే ఓ వ్యక్తి స్థానిక కోర్టులో పిటిషన్ దాఖలు చేసాడు. శ్రీనివాస్ వాదనలు విన్న కోర్టు షూటింగ్ ని నిలిపివేయాలంటూ నోటీసులు జారీచేసింది. ఈ కారణంగా ‘కె.జి.ఎఫ్ చాప్టర్ 2’ షూటింగ్ ని అర్ధాంతరంగా ఆపేసారట. ప్రస్తుతం అదే సీన్లని వేరే లొకేషన్ లో తీయడానికి సన్నాహాలు చేస్తున్నారట. శ్రీనిధి శెట్టి హీరోయిన్ గా నటిస్తున్న ఈ చిత్రంలో బాలీవుడ్ నటుడు సంజయ్ దత్… అధీరా అనే పాత్ర పోషిస్తున్నాడు.
