ఈసారి దేవి శ్రీ ప్రసాద్ పాసైపోయాడు..!

టాలీవుడ్ సూపర్ స్టార్ మహేష్ బాబు హీరోగా నటించిన తాజా చిత్రం ‘సరిలేరు నీకెవ్వరు’. అనిల్ రావిపూడి డైరెక్షన్లో తెరకెక్కిన ఈ చిత్రం జనవరి 11న విడుదల కాబోతుంది. ఈ చిత్రానికి దేవి శ్రీ ప్రసాద్ సంగీత దర్శకుడు. మహేష్ బాబు గత చిత్రం ‘మహర్షి’ చిత్రానికి కూడా ఈయనే సంగీతం అందించాడు. అయితే ఆ చిత్రం ఆడియోకి మిశ్రమ స్పందన లభించింది. మహేష్ కెరీర్లోనే హైయెస్ట్ కలెక్షన్లను రాబట్టినప్పటికీ… ఓవర్సీస్ లో జస్ట్ యావరేజ్ గా మాత్రమే నిలిచింది. ఇందుకు కారణం ఆడియో ఆకట్టుకోకపోవడం వలనే.. అని ట్రేడ్ పండితులు సైతం క్లారిటీ ఇచ్చారు. ఈ కారణంతో ‘సరిలేరు నీకెవ్వరు’ చిత్రానికి దేవి శ్రీ ప్రసాద్ సంగీత దర్శకుడు అని అనౌన్స్ చేసిన వెంటనే మహేష్ అభిమానులు అసహనం వ్యక్తం చేశారు. అయితే ‘ఈసారి కచ్చితంగా మంచి ఆల్బం ఇస్తానని’ వారికి ప్రామిస్ చేసాడు దేవి. డిసెంబర్ నెలంతా ఈ చిత్రం పాటలతో హోరెత్తించారు. తాజాగా ఫుల్ జ్యూక్ బాక్స్ ను విడుదల చేశారు. మరి ఈ పాటలన్నీ ఎలా ఉన్నాయో ఓ లుక్కేద్దాం రండి :

1) మైండ్ బ్లాక్ : శ్రీమణి, సంగీత దర్శకుడు దేవి శ్రీ ప్రసాద్ కలిసి ఈ మాస్ సాంగ్ కు లిరిక్స్ అందించారు. ఫుల్ మాస్ బీట్స్ తో ఇంగ్లీష్ పదాలతో ఈ పాట సాగింది. బ్లాజ్, రనీనా రెడ్డి కలిసి ఈ పాటను ఎంతో జోష్ తో పాడారు. మధ్య మధ్యలో మహేష్ వాయిస్ హైలెట్ అని చెప్పొచ్చు. క్లాస్ ఆడియన్స్ కు ఈ పాట పెద్దగా నచ్చకపోయినా.. మాస్ ఆడియన్స్ ను ముఖ్యంగా మహేష్ అభిమానుల్ని ఈ పాట బాగా ఆకట్టుకుంటుంది అనడంలో సందేహం లేదు. విజువల్ గా కూడా ఈ పాట బాగా వచ్చిందని దర్శకుడు అనిల్ రావిపూడి చాలా సందర్భాల్లో చెప్పుకొచ్చాడు. ఈ పాటలో మహేష్ లుంగీ ధరించి స్టెప్ లు వేసినట్టు కూడా చెబుతున్నారు. ట్రైలర్ లో కూడా ఈ ఈ పాటలోని విజువల్ ను చూపించి ఊరిస్తున్నారు. మరి విజువల్ గా ఈ పాట భాగుంటే.. క్లాస్ ఆడియన్స్ కూడా శాటిస్ఫై అయిపోతారు అనడంలో సందేహం లేదు.

2) సూర్యుడివో చంద్రుడివో : రామజోగయ్య శాస్త్రి సాహిత్యం అందించిన ఈ పాటని… బి. ప్రాక్ అనే కొత్త సింగర్ ఆలపించాడు. తన గాత్రంతో ఈ పాటకు ప్రాణం పోసాడనే చెప్పొచ్చు. సెకండ్ హాఫ్ లో ఈ పాట ఉండబోతున్నట్టు తెలుస్తుంది. ఈ పాటలో విజయశాంతి, మహేష్ స్పెషల్ అట్రాక్షన్ గా నిలువనున్నారని సమాచారం. అన్ని వర్గాల ప్రేక్షకులని అలరించే విధంగా ఈ పాట ఉంది. సో ఈ పాట పాసైపోయిందనే చెప్పాలి.

3) ‘హి ఈజ్ సో క్యూట్’ : శ్రీమణి లిరిక్స్ అందించిన ఈ పాటని మధు ప్రియా పాడింది. మహేష్ బాబు గ్లామర్ ను వర్ణిస్తూ… ముఖ్యంగా అమ్మాయిలు… అందగాడు అయిన మన మహేష్ ను ఎలా పొగుడుకుంటారు అనేది తెలుసుకుని శ్రీమణి ఈ పాటని రాసినట్టు తెలుస్తుంది.
సినిమా ఫస్ట్ హాఫ్ లో ఓ చోట ట్రైన్ ఆగిపోయినప్పుడు మహేష్ ను టీజ్ చేస్తూ హీరోయిన్ రష్మిక మందన ఈ పాట పాడుకుంటుందని స్పష్టమవుతుంది. ఈ పాట కచ్చితంగా ఓ చార్ట్ బస్టర్ అనే చెప్పాలి.

4) సరిలేరు నీకెవ్వరు (టైటిల్ సాంగ్) : మన కోసం బోర్డర్ లో నిద్రహారాలు కూడా లేకుండా కాపలా కాస్తోన్న మన ‘ఇండియన్ ఆర్మీ’ కి అంకితమిస్తూ ఈ పాటను రాసాడు దేవి శ్రీ ప్రసాద్. ఈ పాట కోసం ఎంతోమంది టెక్నికల్ నిపుణులు పని చేశారు. శంకర్ మహదేవన్ పాడిన ఈ పాట వింటుంటే ప్రతీ ఒక్కరికీ గూజ్ బంప్స్ రావడం ఖాయం. ఫస్ట్ హాఫ్ లోనే ఈ పాట ఉండబోతుందని తెలుస్తుంది. ముఖ్యంగా పాట చివర్లో వచ్చే మ్యూజిక్ అందరినీ ఆకట్టుకుంటుంది అనడంలో సందేహం లేదు. ఈ పాట కూడా సూపర్ హిట్ అనే చెప్పాలి.

5) డ్యాంగ్ డ్యాంగ్ : రామజోగయ్య శాస్త్రి లిరిక్స్ అందించిన ఈ పాటని అజీజ్ మరియు లవిత లోబో ఎంతో జోష్ తో పాడారు. ఈ పాట ఎలా ఉండబోతుందో ఇప్పటికే అందరికీ తెలుసు. ఎందుకంటే ఆల్రెడీ ప్రోమోని విడుదల చేశారు. తమన్నా, మహేష్ లు ఈ పాటలో పోటీపడి డ్యాన్స్ చేయడం మనం చూసాం. పక్కా పార్టీ సాంగ్ ఇది.. థియేటర్లలో ఈ పాటకి అదిరిపోయే రెస్పాన్స్ రావడం ఖాయమనిపిస్తుంది. సో ఈ పాట కూడా సూపర్ హిట్టే.. అని చెప్పాలి.

చివరి మాట : దేవి శ్రీ ప్రసాద్ కచ్చితంగా అదిపోయే రేంజ్లో ఆల్బం ఇవ్వలేదు కానీ.. కచ్చితంగా ఓ కమర్షియల్ సినిమాకి ఏ ఆల్బం అవసరమో.. ఆ స్థాయి సాంగీతం అందించడంలో సక్సెస్ సాధించాడు. ఓవరాల్ గా ‘సరిలేరు నీకెవ్వరు’ ఆల్బం హిట్. మరి సినిమా ఎలా ఉండబోతుందో.. జనవరి 11న చూద్దాం..! మీతో పాటు మేము కూడా వెయిటింగ్.