మహేష్‌బాబు (Mahesh Babu) – రాజమౌళి (Rajamouli) కాంబినేషన్‌లో ఓ సినిమా తెరకెక్కనున్న విషయం తెలిసిందే. చాలా ఏళ్లుగా ఈ సినిమా గురించి వినిపిస్తున్నా.. కొన్ని నెలలుగా సినిమా పనులు జోరందుకున్నాయి. రేపు, మాపు అని డేట్స్‌ అంటున్నారు కానీ.. ఎక్కడా, ఎలాంటి క్లారిటీ లేదు. అయితే రూమర్లు మాత్రం చాలానే వస్తున్నాయి. కథ ఇది, కథనం ఇది, కాస్టింగ్‌ ఇది, క్రూ ఇది, టైటిల్‌ ఇది అంటూ ఏదేదో మాట్లాడుతున్నారు. అయితే ఇన్నాళ్లూ ఈ పుకార్ల మీద స్పందించని టీమ్.. ఓ పుకారు వార్తకు మాత్రం క్లారిటీ ఇచ్చింది.
దీంతో మహేష్‌బాబు – రాజమౌళి అభిమానుల్లో చిన్న ఆశ్చర్యం, మరికొంత ఆనందం, ఇంకొంత అనుమానం మొదలైంది. ఈ సినిమా కాస్టింగ్‌ గురించి, ఆ పనులు చూసే వ్యక్తి గురించి ఓ వార్త ఇంగ్లిష్‌ మీడియాలో వచ్చింది. దీనిపై నిర్మాణ సంస్థ క్లారిటీ ఇస్తూ నోట్‌ రిలీజ్‌ చేసింది. రాజమౌళి – మహేశ్‌బాబు ప్రాజెక్ట్‌కు సంబంధించిన నటీనటుల ఎంపికపై రకరకాల వార్తలు వస్తున్నాయి. కొన్ని వెబ్‌సైట్స్‌లో కథనాలు మా దృష్టికి వచ్చాయి అంటూ నోట్‌లో రాసుకొచ్చింది నిర్మాణ సంస్థ.
ప్రముఖ కాస్టింగ్‌ డైరెక్టర్‌ వీరేన్‌ స్వామి తమ సినిమాలో భాగమైనట్లు ఆ పుకారు వార్తల్లో ఉందని, అందులో ఎలాంటి నిజం లేదని క్లారిటీ ఇచ్చేశారు. ఈ సినిమాకు సంబంధించి ఏ అప్‌డేట్‌ అయినా తామే ఇస్తామని, ప్రొడక్షన్‌ హౌస్‌ నుండి వచ్చే అధికారిక ప్రకటనను తప్ప మరే ఇతర అప్‌డేట్‌లను నమ్మొద్దు అని శ్రీ దుర్గ ఆర్ట్స్‌ పేర్కొంది. దీంతో ఈ పుకారుపై క్లారిటీ వచ్చిన ఆనందంతోపాటు… ఇన్నేళ్లుగా పుకార్లకు స్పందించని టీమ్ ఇప్పుడు ఎందుకు రియాక్ట్‌ అయిందనే డౌట్‌ మొదలైంది.
ఇక ఈ సినిమా గురించి చూస్తే.. ప్రీ ప్రొడక్షన్‌ పనులు శరవేగంగా జరుగుతున్నాయి. ఈ పాన్‌ ఇండియా ప్రాజెక్ట్‌కు ‘మహారాజ్‌’ అనే టైటిల్‌ను ఫిక్స్‌ చేసినట్లు కూడా వార్తలు వస్తున్నాయి. ఇక ఇందులో ఇండోనేషియా నటి చెల్సియా ఎలిజబెత్‌ ఇస్లాన్‌ హీరోయిన్‌గా, హాలీవుడ్‌ ప్రముఖ నటుడు క్రిస్‌ హెమ్స్‌వర్త్‌ ఓ కీలక పాత్రధారిగా ఉంటారని చెబుతున్నారు. వీటిపై టీమ్ ఎలాంటి క్లారిటీ ఇవ్వలేదు.
