పాన్ ఇండియా మూవీగా రూపొందిన పుష్ప 2: ది రూల్ (Pushpa 2: The Rule) పై భారీ అంచనాలు నెలకొన్నాయి. ఐకాన్ స్టార్ అల్లు అర్జున్ (Allu Arjun) , సుకుమార్ (Sukumar) కాంబినేషన్‌లో తెరకెక్కుతున్న ఈ చిత్రం డిసెంబర్ 5న ప్రపంచవ్యాప్తంగా విడుదలకు సిద్ధమవుతోంది. ట్రైలర్, పాటలతో ఇప్పటికే భారీ హైప్ పెంచిన ఈ సినిమా, బెనిఫిట్ షోలతో నేరుగా రికార్డుల మీదే దాడి చేయనుందని సినీ వర్గాలు అంచనా వేస్తున్నాయి. తాజాగా ఈ చిత్రానికి సంబంధించి స్పెషల్ స్క్రీనింగ్ నిర్వహించగా, నిర్మాత అల్లు అరవింద్ సినిమాను వీక్షించారు.
ఆయన సినిమాపై ప్రత్యేక అభిప్రాయం వ్యక్తం చేసినట్లు సమాచారం. ఫస్ట్ హాఫ్ ఎమోషనల్ డ్రామాతో సాగుతుందని, కథ ప్రతి ప్రేక్షకుడిని గట్టిగా ఆకట్టుకుంటుందని ఆయన చెప్పినట్లు టాక్. ముఖ్యంగా ఇంటర్వెల్ బ్యాగ్ దగ్గర పెద్ద ట్విస్ట్ ఉంటుందని, ఆ తర్వాత సెకండ్ హాఫ్ మొత్తం యాక్షన్ ప్యాక్డ్ ఎలిమెంట్స్ తో ఫుల్ ఎనర్జీగా సాగుతుందని అభిప్రాయపడ్డారట. సుకుమార్ దర్శకత్వ ప్రతిభను ప్రస్తుత కాలానికి తగ్గట్టు బలంగా చూపించినట్లు తెలుస్తోంది.
పుష్పరాజ్ పాత్రలో అల్లు అర్జున్ సెన్సేషనల్ పెర్ఫార్మెన్స్ ఇచ్చారని బడా నిర్మాత అభినందించినట్లు ప్రచారం. సినిమాలోని ప్రతి యాక్షన్ సీక్వెన్స్ ప్రేక్షకులకు రోమాలు నిక్కబొడుచుకునే అనుభూతిని అందిస్తుందని తెలుస్తోంది. ఇక ఇప్పటికే ఓవర్సీస్ మార్కెట్‌లో అడ్వాన్స్ బుకింగ్స్ ఊహించని స్థాయిలో జరిగాయి. హైదరాబాద్‌లో జరగబోయే ఈవెంట్స్ తో ప్రమోషన్స్ పతాక స్థాయికి చేరుకోబోతున్నాయి.
అమెరికాలో ప్రీమియర్ షోలకు భారీ స్పందన వస్తుండటంతో, దేశీయ మార్కెట్ లో కూడా బుకింగ్స్ కోసం ఫ్యాన్స్ వేయిట్ చేస్తున్నారు. ఇవన్నీ కలిపి చూస్తే పుష్ప 2 సులభంగా వసూళ్ల రికార్డులను తిరగరాయడం ఖాయం అని పరిశ్రమలో నమ్మకంగా ఉంది. మరి ప్రీ రిలీజ్ హైప్ ను బాక్సాఫీస్ వద్ద సినిమా ఎంతవరకు నిలబెడుతుందో చూడాలి.
