తెలుగు సినిమా కథల్లో మార్పు వచ్చింది. దాదాపు కథ మొత్తం హీరో చుట్టూనే తిరిగేస్తోంది. ఇదివరకు పాటలు, ఫైట్లు మాత్రమే చేసే హీరో ఇప్పుడు నవ్వించేస్తున్నాడు. అందుకే కొన్ని పాత్రలు తగ్గిపోతున్నాయి. వాటిలో ప్రధానంగా నవ్వించే జోడి కనిపించకుండా పోతోంది. ఈ సందర్భంగా వెండితెరపై ఇప్పటి వరకు తమ టైమింగ్స్ తో కడుపుబ్బా నవ్వించిన కామెడీ హిట్ పెయిర్ గురించి తెలుసుకుందాం.
పద్మనాభం – గీతాంజలి 
శ్రీ శ్రీ శ్రీ మర్యాద రామన్న, పొట్టిప్లీడరు, దేవత వంటి అనేక సినిమాలో పద్మనాభం – గీతాంజలి తమ నటనతో ఆకట్టుకున్నారు.
రేలంగి – సూర్యకాంతం 
గయ్యాళి భార్యతో తిట్లు తినే భర్త .. అనే పాత్రలు గురించి చెప్పగానే రేలంగి – సూర్యకాంతం జోడి గుర్తుకొస్తుంది. విధి విలాసం, చదువుకున్న అమ్మాయిలు తదితర చిత్రాల్లో వీరు మెప్పించారు.
రాజబాబు – రమాప్రభ 
ఆనాటి చిలిపి జంటగా రాజబాబు – రమాప్రభలు పేరు తెచుకున్నారు. పుట్టినిల్లు మెట్టినిల్లు, రాధమ్మ పెళ్లి .. ఇలా పదుల సంఖ్యలో సినిమాలు చేశారు. ఎంత పెద్ద హీరో సినిమా అయినా ఈ జంట కి తప్పకుండా ఓ పాటని పెట్టేవారు.
సుత్తి వేలు – శ్రీలక్ష్మి 
రెండో తరం కామెడీ హిట్ పెయిర్ లో మొదటగా గుర్తుకు వచ్చేది సుత్తి వేలు – శ్రీలక్ష్మి జంట. హై హైనాయక, రెండు జళ్ల సీత.. ఇలా జంధ్యాల సినిమాల్లో హిట్ పెయిర్ గా పేరు తెచ్చుకున్నారు.
బ్రహ్మానందం – శ్రీలక్ష్మి 
శ్రీలక్ష్మి, సుత్తివేలు మాత్రమే కాకుండా.. బ్రహ్మానందం – శ్రీలక్ష్మి జోడీ కూడా బాగా హిట్ అయింది. శుభలగ్నం, బావ బావ పన్నీరు, జంబలకిడి పంబ.. ఇలా వీరి సినిమాల జాబితా పెద్దదిగానే ఉంది.
మల్లికార్జున రావు – జయలలిత 
మల్లికార్జున రావు – జయలలిత జోడీకి అదనంగా మరో కమెడియన్ కలిసి వెండితెరపై కామెడీ సృష్టించారు.
బ్రహ్మానందం – కోవై సరళ 
క్షేమంగా వెళ్లి లాభంగా రండి సినిమా పేరు చెప్పగానే బ్రహ్మానందం – కోవై సరళ జోడి ముందుగా గుర్తుకు వస్తుంది. అంతలా వారు నవ్వించారు. తిరుమల తిరుపతి వేంకటేశ.. సినిమాలోనూ వీరి కామెడీ టైమింగ్ సూపర్.
రావి కొండల రావు – రాధా కుమారి 
రాధాకుమారి, రచయిత, సినీ నటుడు రావి కొండలరావు ఇద్దరూ నిజజీవితంలో భార్యాభర్తలు. సినిమాల్లోనూ దంపతులుగా అలరించారు.
చలపతి రావు – సుభాషిణి 
అల్లరి సినిమాలో నరేష్ చేసిన అల్లరి కంటే చలపతి రావు, సుభాషిణి కలిసి చేసిన సందడి అంత ఇంతా కాదు. ఆ తర్వాత కూడా వీరిద్దరూ కలిసి నవ్వించారు.
బ్రహ్మానందం – హేమ
బ్రహ్మానందంకి సూటైన మరో హాస్య నటి హేమ. వీరిద్దరూ అతడు సినిమాలో నవ్వుల వర్షం కురిపించారు. అప్పటి నుంచి ఈ జంట కనిపిస్తే కితకితలే.
