మనిషిని పోలిన మనుషులు ప్రపంచంలో ఏడుగురు ఉంటారు అని చెబుతుంటారు మన పెద్దలు. అయితే అందరి సంగతి తెలియదు కానీ.. సెలబ్రిటీల పోలిన వ్యక్తుల గురించి అయితే వార్తలు వస్తూనే ఉంటాయి. అయితే సెలబ్రిటీని పోలిన వ్యక్తి కూడా సెలబ్రిటీ అయితే ఈ విషయం ఆశ్చర్యం కలిగించేదే. టీమిండియా ప్రముఖ క్రికెటర్‌ విరాట్ కోహ్లీని (Virat Kohli) పోలిన వ్యక్తి అంటూ కొన్ని ఫొటోలు చాలా రోజులుగా సోషల్‌ మీడియాలో చక్కర్లు కొడుతున్నాయి. ఇప్పుడు ఓ నటుడు కోహ్లీ లానే ఉన్నాడు.
విరాట్ కోహ్లీలానే (Virat Kohli) ఉన్నాడు చూడండి అంటూ గత రెండ్రోజులుగా ఓ సినిమాలోని స్క్రీన్‌షాట్‌ సోషల్‌ మీడియాలో వైరల్ అవుతోంది. టర్కీకి చెందిన ప్రముఖ నటుడు కావిట్ సెటిన్ గునెర్ ఆ ఫొటోలో ఉన్నాడు. ఒక టీవీ సీరీస్‌లోని సన్నివేశానికి సంబంధించి స్క్రీన్‌ షాట్‌ ఇది. ఈ క్రమంలో కొందరు ‘టీవీ సీరీస్‌లో అందులోనూ టర్కీ టీవీ సిరీస్‌లో విరాట్ కోహ్లీ ఎలా?’ అని కొంతమంది ఆ ఫొటోల కింద కామెంట్స్‌ చేస్తున్నారు.
నిజానికి ఈ చర్చ రెడిట్‌లో మొదలైంది. ‘అనుష్క శర్మ భర్త టీవీ షో అరంగేట్రం చేశాడు’ అని ఓ నెటిజన్‌ కావిట్ సెటిన్ స్క్రీన్‌షాట్‌ను పోస్ట్ చేశాడు. కోహ్లీని తలపించే కళ్లు, గడ్డం, ముఖ ఆకృతి, హెయిర్‌స్టైల్‌ చూసి కొంతమంది నిజమే అనుకున్నారు. అయితే ఆ వ్యక్తి కోహ్లీ కాదు, టర్కీ కోహ్లీ (Virat Kohli) అని ఆ ఫొటో కింద కామెంట్‌ కనిపించింది. దీంతో ఇది నిజమేనా కావిట్ ఇన్‌స్టాగ్రామ్‌ చూస్తే.. కొన్ని యాంగిల్స్‌లో అతను విరాట్‌లానే ఉన్నాడు.
ఆ ఫోటో ‘డిర్లిస్‌: ఎర్టుగ్రుల్‌’ అనే టర్కీ హిస్టారికల్ డ్రామా సిరీస్‌కి సంబంధించినది. 2014లో నుండి 2019 వరకు ఐదు సీజన్లుగా ఈ సిరీస్‌ ప్రసారం అయింది. మీరూ ఈ సిరీస్‌ చూడాలి అనుకుంటే నెట్‌ఫ్లిక్స్‌లో స్ట్రీమ్‌ అవుతోంది. ఏదైనా ఇద్దరు సెలబ్రిటీలు దాదాపు ఒకేలా ఉండటం ఆసక్తికరమే కదా.
