త్రివిక్రమ్.. అల్లు అర్జున్‌తో చేయాల్సిన సినిమాను.. తారక్‌తో చేస్తున్నాడు అని లైట్‌గా ఓ లైన్‌లో చెప్పేస్తున్నారు కానీ గతంలో జరిగిన పరిస్థితుల్ని చూస్తుంటే ఇదేదో సినిమా చేతులు మారడం మాత్రమే కాదు.. ఎన్నో ఏళ్లుగా కలసి ఉన్న రెండు కుటుంబాలు దూరమయ్యాయి. అలాగే ఎన్నో ఏళ్లుగా దూరంగా ఉన్న ఇద్దరు వ్యక్తులు కలిశారు. ఇదేదో పెద్ద స్టేట్‌మెంట్‌లా ఉండొచ్చు కానీ.. రీసెంట్‌ పరిణామాలు చూస్తే మీకే అర్థమవుతుంది. ఎందుకంటే మాటలు మారాయి, మనసులు మారాయి, ఆఖరిగా సినిమా చేతులు మారింది.
తారక్‌ – త్రివిక్రమ్ (Trivikram) – హారిక హాసిని కాంబినేషన్‌లో చాలా నెలల క్రితం ఓ సినిమా అనౌన్స్‌ అయింది. ‘దేవర’ సినిమాకు ముందు ఆ సినిమా చేయాల్సింది. అయితే ఏమైందో ఏమో ఆ ప్రాజెక్ట్‌ ఆగిపోయింది. (అయితే హోల్డ్‌లో పడింది అని అంటారు అనుకోండి.) అసలేమైంది అనే విషయం తెలియకపోయినా.. తారక్‌ – త్రివిక్రమ్ మధ్య గ్యాప్‌ వచ్చిందని వార్తలొచ్చాయి. అక్కడికి కొద్ది రోజులకు అల్లు అర్జున్‌ – త్రివిక్రమ్ – హారిక హాసిని కాంబినేషన్‌లో సినిమా అనౌన్స్‌ చేశారు. దీంతో ఆ ప్రాజెక్ట్‌ ఇటొచ్చింది అని అనుకున్నారంతా.
ఇప్పుడు మళ్లీ వివిధ పరిణామాల నేపథ్యంలో సినిమా తారక్‌ దగ్గరకు వచ్చింది. అప్పుడనుకున్న కథ, ఇప్పుడు అనుకుంటున్న కథ ఒక్కటో లేదో తెలియదు కానీ.. త్రివిక్రమ్ సినిమా అయితే తారక్‌ చేస్తాడు అని నిర్మాత నాగవంశీ తేల్చేశారు. దీనికి ఆయువు పడింది మాత్రం కొన్ని రోజుల క్రితం జరిగిన ఓ సినిమా బహిరంగ సభలో. ఆ స్టేజీ మీద తారక్‌ మాట్లాడుతూ.. త్రివిక్రమ్‌తో మాట్లాడాల్సి ఉందనే యాంగిల్‌లో మాట్లాడాడు. అక్కడి నుంచి ఇద్దరి మధ్య ప్యాచప్‌ మొదలైంది అని చెప్పాలి.
ఇక అల్లు అర్జున్‌ – త్రివిక్రమ్ విషయానికొస్తే ఇద్దరి కాంబినేషన్‌లో మూడు సినిమాలు వచ్చాయి. ‘జులాయి’, ‘అల వైకుంఠపురములో’, ‘సన్నాఫ్ సత్యమూర్తి’ మంచి విజయాలు అందుకున్నాయి. అంతటి హిట్‌ కాంబో వారిది. అలాంటి అనుబంధం ఉన్న వీరిద్దరి సినిమా ఆగిపోవడం అంటే ఎక్కడో డిఫరెన్స్‌ వచ్చింది అనే. తమ సినిమా అనౌన్స్‌ చేసి అట్లీ సినిమా ఓకే చేయడం నచ్చలేదా అనేది చెప్పలేం. ఎందుకంటే బన్నీ నెక్స్ట్‌ రెండు సినిమాలు పారలల్‌గా చేద్దామని అనుకుంటున్నట్లు చెప్పారు. కాబట్టి అట్లీ సినిమా వల్ల, త్రివిక్రమ్ సినిమాకి క్లాష్‌ లేదు. అంతకుమించి ఇంకేదైనా జరిగి ఉండాలి. అదేంటి అనేది త్వరలో తెలియొచ్చు.
Home