శివ కందుకూరిహాట్ స్టార్ లో స్ట్రీమ్ అవుతున్న ఈ 7 ఎపిసోడ్ల సిరీస్ తో రీతు వర్మ మొదటిసారి ఓటీటీ ప్లాట్ ఫార్మ్ కి ఎంట్రీ ఇచ్చింది. మరి ఈ సిరీస్ ఆడియన్స్ ను అలరించగలిగిందో లేదో చూద్దాం..!!
కథ: తాతయ్య నుంచి పుణికిచ్చుకున్న కొన్ని శక్తుల కారణంగా ఆత్మలను చూడగలుగుతుంది దేవిక (రీతు వర్మ). ఆమె సహాయం పొందడం కోసం హైదరాబాద్ నుంచి వస్తాడు డానీ (సూర్య వశిష్ట).
డానీకి సహాయం చేసే క్రమంలో అనుకోని విధమైన చిక్కుల్లో పడుతుంది దేవిక.
అసలు డానీ ఎవరు? అతను ఎందుకు చనిపోతాడు? దేవిక నుంచి డానీ ఎలాంటి సహాయం పొందాలనుకుంటాడు? ఆ సహాయం చేసే క్రమంలో దేవిక ఎదుర్కొన్న ఇబ్బందులేమిటి? అనేది “దేవిక & డానీ” (Devika & Danny) వెబ్ సిరీస్ కథాంశం.
నటీనటుల పనితీరు: రీతువర్మ మరోసారి డీసెంట్ పెర్ఫార్మెన్స్ తో ఆకట్టుకుంది. ఆమె పోషించిన క్యారెక్టర్ లో మంచి డిఫరెంట్ ఎమోషన్స్ ఉన్నాయి. తండ్రి మాట జవదాటని కూతురుగా, ఉద్యోగాన్ని ప్రేమించే నవతరం యువతిగా, తనను నమ్మిన వ్యక్తి కోసం ఎంతకైనా తెగించే మహిళగా మంచి నటన కనబరించింది. శివ కందుకూరిని మొన్నటివరకు సీరియస్ రోల్స్ లో చూడడంతో.. ఈ సిరీస్ లో అతడి కామెడీ టైమింగ్, ఇన్నోసెన్స్ అలరిస్తుంది. సిరీస్ లో కీలకపాత్ర పోషించిన సూర్య వశిష్ట యాక్టింగ్ డీసెంట్ గా ఉన్నప్పటికీ.. ఎందుకనో క్యారెక్టర్ ఎస్టాబ్లిష్మెంట్ సరిగా కుదరక ఎలివేట్ అవ్వాల్సిన స్థాయిలో అవ్వలేదు.
సుబ్బరాజు క్యారెక్టర్ ద్వారా మంచి కామెడీ పండింది. కోవై సరళ, అభినయాలను వారి ఇమేజ్ కు భిన్నమైన పాత్రల్లో చూడడం కాస్త కొత్తగా ఉంది. విలన్ రోల్స్ మరీ రొటీన్ గా ఉన్నాయి.
సాంకేతికవర్గం పనితీరు: టెక్నికల్ గా డీసెంట్ గా ఉన్నప్పటికీ.. డి.ఐ వల్లనో లేక కలరింగ్ చాయిస్ వలనో సిరీస్ చూస్తున్న భావన కలగకుండా, ఏదో సీరియల్ చూస్తున్న ఫీల్ కలుగుతుంది. ఆ ఎఫెక్ట్ సిరీస్ మీద కాస్త నెగిటివ్ ఫీలింగ్ ఇచ్చింది. అయితే.. సీజీ వర్క్ విషయంలో నిర్మాతలు రాజీపడకపోవడంతో క్వాలిటీ బాగా వచ్చింది. సినిమాటోగ్రఫీ, మ్యూజిక్, ఆర్ట్ వర్క్, కాస్ట్యూమ్స్ వంటి టెక్నికాలిటీస్ అన్నీ తమ బెస్ట్ ఇచ్చాయి.
దర్శకుడు బి.కిషోర్ తన ఇమేజ్ ను డ్యామేజ్ అవ్వకుండా.. ఎక్కడా ఒక్క బూతు మాట లేకుండా, అనవసరమైన ఎక్స్ పోజింగులు లేకుండా.. కుటుంబం అందరూ కలిసి చూసేలా ఈ సిరీస్ ను తెరకెక్కించాడు. చిన్నపాటి ఎగ్జైట్మెంట్ ను క్రియేట్ చేయడమే కాక.. హీరోయిన్ క్యారెక్టర్ జర్నీతో ఆడియన్స్ కనెక్ట్ అయ్యేలా చేశాడు. అందువల్ల 7 ఎపిసోడ్ల సిరీస్ తో ఎక్కడా ఇబ్బందికలగదు. క్యాస్టింగ్ విషయంలో, అలాగే వారి నుంచి పాత్రకు తగ్గ నటనను రాబట్టుకోవడంలో సక్సెస్ అయ్యాడు. ఓవరాల్ గా తన రెండో ప్రయత్నంలోనూ ఫర్వాలేదనిపించుకున్నాడు దర్శకుడు బి.కిషోర్.
విశ్లేషణ: ముందు పేర్కొన్నట్లుగా సీరియల్ ను తలపించే కలరింగ్ & రొటీన్ విలన్ క్యారెక్టర్స్ ను పక్కన పెడితే.. ఎలాంటి అసభ్యతకు తావు లేని డీసెంట్ వెబ్ సిరీస్ “దేవిక & డానీ”. ఈ 7 ఎపిసోడ్ల సిరీస్ ను ఎలాంటి టెన్షన్ లేకుండా సరదాగా ఫ్యామిలీతో కలిసి చూడొచ్చు.
ఫోకస్ పాయింట్: డేరింగ్ దేవిక, డీసెంట్ డానీ!
రేటింగ్: 2/5
Home