Prasanth Varma: ప్రశాంత్‌ వర్మ ఈ సినిమా కూడా వదిలేసుకున్నారా? వరుసగా రెండోది…!

తీసినవి నాలుగు సినిమాలు.. ఇంకో సినిమా వచ్చే ఏడాది వస్తుంది అని ప్రకటించారు. చేతిలో మరికొన్ని సినిమాలు ఉన్నాయి. ఒకటి అనౌన్స్‌ చేసి చాలా రోజులైంది, అదిప్పుడు చేతులు మారుతోంది అంటున్నారు. ఇంకొకటి అనౌన్స్‌మెంట్‌ ముందే ఆగిపోయింది. దీంతో ఆ దర్శకుడి విషయంలో ఏం జరుగుతోంది. ఎందుకు ఇలా ఆయన సినిమాలు ఎందుకు ఆగుతున్నాయ్‌, చేతులు మారుతున్నాయ్‌ అనేది అర్థం కాని పరిస్థితి. ‘ఆ!’ (Awe) సినిమాతో టాలీవుడ్‌కి పరిచయమైన దర్శకుడు ప్రశాంత్‌ వర్మ (Prasanth Varma).

ఆ తర్వాత ‘కల్కి’, ‘జాంబీ రెడ్డి’ (Zombie Reddy) అంటూ రెండు సినిమాలు చేసి ‘ఈ దర్శకుడు సగటు డైరెక్టర్‌’ కాదు అని చెప్పకనే చెప్పారు. ఆ తర్వాత ‘హను – మాన్‌’ (Hanu Man) అంటూ ఓ సినిమా అనౌన్స్‌ చేసి షాకిచ్చారు. ఏదో మామూలు సినిమా అనుకుంటున్నారేమో.. అస్సలు కాదు, సినిమా చూశాక మీకే తెలుస్తుంది అని టీజర్‌, ట్రైలర్‌తో చూపించిన ఆయన.. సినిమా వచ్చేసరికి ‘ఈయన మామూలోడు కాదు’ అని చెప్పారు. ‘హను – మాన్‌’ సినిమాతో ఒక్కసారిగా పాన్‌ ఇండియా ఇమేజ్‌ వచ్చేసింది.

వరుస ఛాన్స్‌లు రావడం మొదలుపెట్టాయి. కానీ ఇప్పుడు ఏదో ఇబ్బంది మొదలైంది. వరుసగా రెండు సినిమాల ఆయన నుండి దూరం అవుతున్నాయి. ఒక విషయంలో ఇప్పటికే ఓ సినిమా టీమ్‌ అనౌన్స్‌ చేసేసింది. రెండో టీమ్‌ ఇప్పుడు అదే పనిలో ఉంది అంటున్నారు. ఓ యువ దర్శకుడిని దీని కోసం సిద్ధం చేస్తున్నారు. అయితే ఈసారి సామరస్యపూర్వకంగా మార్పు జరుగుతుంది అని అంటున్నారు.

‘ఆర్‌ఆర్‌ఆర్‌’ (RRR) సినిమా సమయంలోనే ‘అధీరా’ అనే ఓ సినిమా స్టార్ట్‌ అయింది గుర్తుందా? ‘ఆర్‌ఆర్‌ఆర్‌’ నిర్మాత డీవీవీ దానయ్య (D. V. V. Danayya) తనయుడు కల్యాణ్‌ దాసరి హీరోగా ఆ సినిమా ప్రారంభించారు. పెద్ద ఎత్తున ఈవెంట్ కూడా పెట్టారు. ఆ సినిమా గురించి ఇటీవల ఎలాంటి ముచ్చటా లేదు. అయితే ’అధీరా’ బాధ్యతను ‘నా సామిరంగ’ (Naa Saami Ranga) దర్శకుడు విజయ్ బిన్నీకి (Vijay Binni) ఇచ్చారు అని టాక్‌. త్వరలోనే ఈ విషయాన్ని అధికారికంగా ప్రకటిస్తారట. ఇదంతా ఓకే కానీ.. ఎందుకు సినిమాలు ఇలా చేతులు మారుతున్నాయి.