దసరాకు తలపడనున్న మహేష్, పవన్ కళ్యాణ్ చిత్రాలు

ఆరోగ్యవంతమైన పోటీ ఉంటే ఏ రంగమైనా ముందుకు వెళ్తుంది. ప్రస్తుతం టాలీవుడ్ లో అటువంటి పోటీ నడుస్తోంది. సంక్రాంతికి స్టార్ హీరోలు చిరంజీవి, బాలకృష్ణ తమ చిత్రాలతో బరిలోకి దిగి విజయాలను అందుకున్నారు. ఇంతటి పెద్ద వార్ ఈ ఏడాదిలో మరో సారి జరగనుందని ట్రేడ్ వర్గాల వారు అంచనా వేస్తున్నారు. వచ్చే దసరా సెలవుల్లో ఈ పోటీ ఉంటుందని చెబుతున్నారు. అప్పుడు థియేటర్లలో రాబోతున్న హీరోలు ఎవరో కాదు .. పవర్ స్టార్ పవన్ కళ్యాణ్, సూపర్ స్టార్ మహేష్ బాబు. సాధారణంగానే వీరి చిత్రాలకు భారీ క్రేజ్ ఉంటుంది. ఈ సారి వారు రాబోతున్నది తమకి బ్లాక్ బస్టర్ హిట్ ఇచ్చిన దర్శకులతో కలిసి కావడంతో వార్ హీట్ పెరుగుతోంది.

ప్రస్తుతం డాలీ దర్శకత్వంలో కాటమరాయుడు చేస్తున్న పవన్.. దీని తర్వాత మాటల మాంత్రికుడు త్రివిక్రమ్ శ్రీనివాస్ తో మూవీ చేయనున్నారు. జల్సా, అత్తారింటికి దారేది హిట్లతో హిట్ కాంబినేషన్ గా పేరు తెచ్చుకున్న ఈ కాంబోలో మూడో మూవీ దసరాకు రాబోతోంది. మురుగదాస్ డైరక్షన్లో యాక్షన్ థ్రిల్లర్ చేస్తున్న మహేష్ బాబు, దీని తర్వాత తనకి శ్రీమంతుడు వంటి ఇండస్ట్రీ హిట్ ఇచ్చిన కొరటాల శివ దర్శకత్వంలో “భరత్ అను నేను” అనే మూవీ చేయనున్నారు. ఈ చిత్రం మార్చి నుంచి పట్టాలెక్కి దసరాకు రెడీ కానుంది. ఎప్పుడూ పోటీల గురించి పట్టించుకోని వీరిద్దరూ ఒకేసారి వస్తారా?  లేదా … ఒకరి కోసం మరొకరు డేట్స్ అడ్జెస్ట్ చేసుకుంటారో తెలియాలంటే మరికొంతకాలం ఆగాల్సిందే.

Also, do SUBSCRIBE to our YouTube channel to get latest Tollywood updates.