ప్రస్తుతం మంచు వారి ఇంట సినిమా వాతావరణం చాలా వేడిగా ఉంది. మోహన్ బాబు, మంచు మనోజ్ వరుస ప్రాజెక్టులతో ఫుల్ బిజీ అయిపోయారు. మోహన్ బాబు.. నాని ‘ది ప్యారడైజ్’ సినిమాలో విలన్ గా రీ ఎంట్రీ ఇస్తుంటే, మనోజ్ ‘మిరాయ్’, ‘భైరవం’ అంటూ పాన్ ఇండియా రేంజ్ లో దూసుకెళ్తున్నాడు. ఇలా ఇంట్లో అందరూ బిజీగా ఉంటే, మరి మంచు విష్ణు నెక్స్ట్ స్టెప్ ఏంటి? ‘కన్నప్ప’ తర్వాత విష్ణు ఎందుకు ఇంత గ్యాప్ తీసుకుంటున్నాడు? అనే చర్చ ఇప్పుడు ఇండస్ట్రీలో నడుస్తోంది.
Manchu Vishnu
నిజానికి ‘కన్నప్ప’ సినిమా ఫలితం ఎలా ఉన్నా, విష్ణుకు మాత్రం ఆ ప్రాజెక్ట్ మంచి గుర్తింపు తెచ్చింది. అంత భారీ స్కేల్ లో సినిమా తీయగలనని నిరూపించుకున్నాడు. కానీ ఇప్పుడు కావాల్సింది గుర్తింపు కాదు, బాక్సాఫీస్ దగ్గర నిలిచే కమర్షియల్ సక్సెస్. అందుకే శ్రీను వైట్లతో అనుకున్న ‘ఢీ’ సీక్వెల్ ను కూడా పక్కన పెట్టి, కథల వేటలో పడ్డాడని తెలుస్తోంది. విష్ణు బలం ఎప్పుడూ కామెడీ, ఎంటర్టైన్మెంట్. మళ్లీ ఆ జోనర్ లోనే ఒక హిట్ కొట్టాలని గట్టిగా ప్రయత్నిస్తున్నాడు.
ఒకప్పుడు ‘దేనికైనా రెడీ’, ‘దూసుకెళ్తా’ వంటి సినిమాలతో విష్ణుకి మాస్ లో, ఫ్యామిలీస్ లో మంచి ఫాలోయింగ్ ఉండేది. మధ్యలో ప్రయోగాలు చేసి ఆ ట్రాక్ తప్పాడు. ఇప్పుడు మళ్లీ పాత విష్ణుని బయటకు తీయాల్సిన అవసరం వచ్చింది. కొత్త కుర్రాళ్లు వైవిధ్యమైన కథలతో వస్తున్న ఈ టైమ్ లో, రొటీన్ కథలు చేస్తే వర్కవుట్ అవ్వదని గ్రహించి, ఆచి తూచి అడుగులు వేస్తున్నాడు.
మనోజ్ కంబ్యాక్ స్ట్రాంగ్ గా ఉండటం, మోహన్ బాబు విలన్ గా సెకండ్ ఇన్నింగ్స్ స్టార్ట్ చేయడం.. ఇవన్నీ విష్ణుపై ఒత్తిడి పెంచే అంశాలే. సోలో హీరోగా తనను తాను ప్రూవ్ చేసుకోవడానికి ఇదే సరైన సమయం. ‘కన్నప్ప’ ఇచ్చిన బజ్ ని వాడుకుని, ఒక పర్ఫెక్ట్ ఎంటర్టైనర్ తో వస్తే ఆడియన్స్ కచ్చితంగా వెల్కమ్ చెబుతారు. ప్రస్తుతం విష్ణు దృష్టి అంతా ఒక సాలిడ్ డైరెక్టర్ ను సెట్ చేసుకోవడం మీదే ఉంది. కామెడీ టైమింగ్ ఉన్న డైరెక్టర్ దొరికితే వెంటనే ప్రాజెక్ట్ అనౌన్స్ చేసే ఛాన్స్ ఉంది.
