రామ్చరణ్ (Ram Charan) – బుచ్చిబాబు సానా (Buchi Babu) కాంబినేషన్లో తెరకెక్కుతున్న చిత్రం ‘పెద్ది’(RC16/Peddi). ఈ పేరును టీమ్ ఫైనల్ చేయకపోయినా ఇదే టైటిల్ పరిశీలనలో ఉందని సమాచారం. ఆ విషయం పక్కనపెడితే ఈ సినిమా కాస్టింగ్ విషయంలో వినిపిస్తున్న కొత్త పేర్లు సినిమాను ఇంకా ఎత్తుకు తీసుకెళ్తున్నాయి. కాస్త నిడివి ఉన్న పాత్రలకు సైతం పెద్ద నటుల్నే తీసుకొస్తున్నారట. అలాంటిది కీలక పాత్రలకు ఇంకెంత పెద్ద స్టార్లను తీసుకుంటున్నారో మీరే ఊహించుకోండి. తాజాగా ఈ సినిమాలో చరణ్ తాతగా నటించేది ఎవరు అనే విషయం తెలిసింది.
చరణ్ సినిమా కోసం బుచ్చిబాబు భారీ కాన్వాస్ ఉన్న సినిమా కథ రాశారని మనం ఇప్పటికే చదువుకున్నాం. ఈ సినిమాలో కథానాయికగా లాంగ్ వెయిటింగ్ కాంబినేషన్ జాన్వీ కపూర్ను తీసుకున్నారు. ఇప్పుడు ఈ సినిమాలో తాత పాత్ర కోసం బాలీవుడ్ మెగాస్టర్ను తీసుకొస్తున్నారట. అవును అమితాబ్ బచ్చన్ను (Amitabh Bachchan) ఈ సినిమాలో నటింపజేసే ప్రయత్నాలు సాగుతున్నాయట. పెద్ది పాత్రకు ఇన్స్పిరేషన్గా ఉండే ఆ పాత్రకు ఆయనైతే బాగుంటుంది అని చెబుతున్నారు.
ఇక విలన్గా ‘యానిమల్’ (Animal) ప్రతినాయకుడు బాబీ డియోల్ను (Bobby De0l) తీసుకుంటున్నారు అని కూడా వార్తలొస్తున్నాయి. తొలుత ఈ పాత్ర కోసం విజయ్ సేతుపతిని అడిగారు. ఆయన ఓకే అన్నారనే మాటలు కూడా వచ్చాయి. కానీ ఇప్పుడు ఆ పాత్ర బాబీకి అయితే బాగుంటుంది అని అనుకుంటున్నారట బుచ్చిబాబు. ఇవేకాదు మరికొన్ని పాత్రలకు కూడా ఇలానే కాస్త పేరున్న నటుల్నే తీసుకుంటారట. త్వరలోనే ఈ విషయంలో క్లారిటీ వస్తుంది అంటున్నారు.
మైత్రి మూవీ మేకర్స్ తో కలిసి, వెంకట సతీష్ కిలారు (Venkatesh Kilaru) ఈ సినిమాకి నిర్మాతగా వ్యవహరిస్తున్నారు. ఈ సినిమాకి ఏఆర్ రెహమాన్ (A.R.Rahman) సంగీతం అందిస్తున్నారు. గ్రామీణ క్రీడా నేపథ్యంలో ఈ సినిమా తెరకెక్కనుంది అని అంటున్నారు. అయితే ఆ కథేంటి, నేపథ్యమేంటి అనే విషయాలు మాత్రం టీమ్ చెప్పడం లేదు. సినిమా షూటింగ్ మొదలైతే కానీ ఈ విషయంలో క్లారిటీ రాదు.
