పవన్ కల్యాణ్ (Pawan Kalyan) సినిమాలు చేసే స్పీడ్‌ గురించి చాలా ఏళ్లుగా ఓ కంప్లయింట్‌ ఉంది. సినిమాకు సినిమాకు చాలా రోజులు గ్యాప్‌ ఉంటుంది. అదెంత అంటే ఒక్కోసారి ఏడాది కూడా అయిపోతూ ఉంటుంది. అయితే ఇదంతా ఆయన పాలిటిక్స్‌లోకి వచ్చే ముందే. ఇప్పుడు ఆ గ్యాప్‌ ఇంకా పెరిగింది అనుకోండి. అయితే డిప్యూటీ సీఎం అవ్వడానికి ముందు ఎంచుకున్న, స్టార్ట్ చేసిన సినిమాలను ఇప్పుడు పవన్ పూర్తి చేసే పనిలో ఉన్నాడు.
ఈ క్రమంలో ‘ఈ స్పీడ్‌ అప్పుడుంటేనా..’ అంటూ ఫ్యాన్స్ నాటి రోజుల్ని గుర్తు చేసుకుంటున్నారు. ఇంతకీ ఏమైందంటే.. రెండేళ్ల క్రితం ‘బ్రో’ (BRO) సినిమాతో బాక్సాఫీసు దగ్గరకు వచ్చాడు పవన్ కల్యాణ్. ఆ తర్వాత పైన చెప్పిన రాజకీయ కారణాల వల్ల సినిమాలు చేయలేదు. రీసెంట్‌గా వరుస డేట్స్ ఇచ్చి ‘హరి హర వీరమల్లు’ (Hari Hara Veera Mallu) సినిమా పూర్త ఇచేశాడు.
మొన్నీమధ్య నాలుగు గంటల్లో సినిమా డబ్బింగ్ చెప్పేసి పూర్తి చేశాడు. ఈ సినిమాను ఈ నెల 12న రిలీజ్ చేయబోతున్నారు. ఆ రోజే మరో స్పెషల్ కూడా ఉంది పవన్ ఫ్యాన్స్. ‘ఉస్తాద్ భగత్ సింగ్’ (Ustaad Bhagat Singh) సెట్‌లోకి పవన్ వచ్చేది కూడా ఆ రోజేనట. హరీష్ శంకర్ (Harish Shankar) దర్శకత్వంలో పవన్ కల్యాణ్ నటిస్తున్న సినిమా ‘ఉస్తాద్ భగత్ సింగ్’. ఈ సినిమాకు పవన్ ఇటీవల డేట్స్ ఇవ్వడంతో త్వరలో కొత్త షెడ్యూల్ స్టార్ట్ చేయడానికి సన్నాహాలు చేస్తున్నారు.
జూన్ 12 నుండి ‘ఉస్తాద్..’ తిరిగి ఆన్‌ డ్యూటీ అనే సోషల్‌ మీడియా పోస్ట్‌ రెడీ అవుతోందట. మొదటి రోజు నుండే పవన్ షూటింగ్‌లో పాల్గొంటారట. ఇలా సినిమా తర్వాత సినిమాను స్టార్ట్ చేసి వేగంగా పూర్తి చేసి ఉంటే పవన్ ఈ పాటికి 50 సినిమాలు చేసేసేవాడు. ఏమంటారు మేం చెప్పేది నిజమే కదా. అన్నట్లు ‘ఓజీ’ (OG Movie) సినిమా షూటింగ్‌ కూడా పారలల్‌గా జరుగుతోంది.
Home