‘వార్‌ 2’ సినిమా తర్వాత ఎన్టీఆర్ (Jr NTR) ప్రశాంత్ నీల్‌ (Prashanth Neel) సినిమాలో నటిస్తాడు అనే విషయం తెలిసిందే. ఈ ప్రాజెక్ట్‌ అనౌన్స్‌ అయి చాలా రోజులు అయింది. అయితే ప్రశాంత్ నీల్‌ ఇతర సినిమాలతో బిజీగా ఉండటం వల్ల ఇప్పుడు ప్రారంభమవుతుంది అని అంటున్నారు. అయితే ఈ విషయంలో ఇంకా క్లారిటీ లేదు అనుకోండి. ఈ క్రమంలోనే తారక్‌ మరో సినిమాను ఓకే చేశాడు అంటూ ఓ వార్త సోషల్‌ మీడియాలో షికార్లు చేసింది.
అనుకున్నట్లుగా ఆ పుకార్లలోని దర్శకుడు ఇటీవల తారక్‌తో కలసి ఓ ఈవెంట్‌లో కనిపించారు. దీంతో ఇంకేముంది ఇద్దరి సినిమా ఫిక్స్‌ అయింది, అందుకే ఆ డైరెక్టర్‌ వచ్చారు అంటూ కొత్త కథలు అల్లేశారు. అంతేకాదు ఆ సినిమా నిర్మాత ఓకే అనేశారు త్వరలో ప్రారంభం అనేలా కూడా చెప్పారు. అయితే తాజాగా ఈ సినిమా విషయంలో నిర్మాతే క్లారిటీ ఇచ్చారు. దీంతో ఇద్దామనుకున్న హైప్‌ దిగిపోయింది.
ఆలూ లేదు చూలూ లేదు కొడుకు పేరు సోమలింగం అని ఓ సామెత ఉంది మీకు గుర్తుండే ఉంటుంది. ఇప్పుడు తారక్‌ – నెల్సన్ ప్రాజెక్ట్‌ గురించి చూస్తే అదే మాట అనాలని అనిపిస్తోంది. ఎందుకంటే ఇంతవరకు తారక్‌కు నెల్సన్ (Nelson Dilip Kumar) కథే చెప్పలేదు. త్వరలో అంతా ఓకే అనుకుంటే ఎన్టీఆర్‌కు నెల్సన్ కథ వినిపిస్తామని ఆ సినిమాకు రూమర్డ్ నిర్మాత నాగవంశీ (Suryadevara Naga Vamsi) చెప్పేశారు. అంటే ఈ ప్రాజెక్ట్‌ విషయంలో ఇంకా ఒక్క అడుగు కూడా పడలేదు.
నెల్సన్ – ఎన్టీఆర్ సినిమా కథపై ఇంకా ఎలాంటి క్లారిటీ లేదు. ఎన్టీఆర్‌తో నెల్సన్ సినిమా అని ఓ మాట అనుకున్నామందతే. నెల్సన్ ప్రస్తుతం కథ రాస్తున్నారు. త్వరలో తారక్‌ను కలుస్తారు. కథ చెప్పాక, నచ్చాక ఆ సినిమాని ఎలా లాంచ్ చేయాలి, ఏ రేంజ్ లో ప్లాన్ చేయాలి లాంటి అంశాల గురించి ఆలోచిస్తాం అని నాగవంశీ చెప్పుకొచ్చారు. ఈ సినిమా ఒకవేళ ఉంటే.. ‘జైలర్ 2’ (Jailer) తర్వాతే స్టార్ట్ చేస్తారు అని టాక్‌.
Home