ఫిట్ నెస్ బ్యూటీ రకుల్ ప్రీతి సింగ్ వరుస విజయాలతో దూసుకు పోతోంది. నాన్నకు ప్రేమతో, సరైనోడు చిత్రాల్లో అందం, అభినయంతో అభినందనలు అందుకున్న ఈ భామ ప్రస్తుతం మెగా పవర్ స్టార్ రామ్ చరణ్ తేజ్ ధ్రువ సినిమాలో నటిస్తోంది. ఇప్పుడు మరో పెద్ద అవకాశం దక్కించుకుందని సమాచారం. కమర్షియల్ డైరక్టర్ ఏఆర్ మురుగదాస్ దర్శకత్వంలో సూపర్ స్టార్ మహేష్ బాబు నటించనున్న చిత్రంలో హీరోయిన్ గా ఎంపికయినట్లు తెలిసింది. ఏకకాలంలో తెలుగు, తమిళ భాషల్లో తెరకెక్కుతున్న ఈ సినిమాకు బాలీవుడ్ హీరోయిన్ పరిణీతి చోప్రాను ఎంచుకున్నారు.
కానీ ఆమె ఈ ప్రాజెక్టు నుంచి తప్పుకోవడంతో వేట మొదలయింది. చిత్ర బృందం రకుల్ ప్రీతి సింగ్ ను సంప్రదించారు. మహేష్ పక్కన అనగానే ఆమె ఎంతో సంతోషంతో ఒకే చెప్పేసింది. టెస్ట్ షూట్ లో కూడా పాల్గొంది. త్వరలో ఆమె పేరును చిత్ర యూనిట్ అధికారికంగా ప్రకటించనున్నట్లు టాక్. ఈనెల 15 నుంచి షూటింగ్ మొదలు కావాల్సి ఉండగా.. కొన్ని కారణాల వల్ల వాయిదా పడింది. ఆగస్టు నుంచి హైదరాబాద్లో తొలి షెడ్యూల్ ప్రారంభం కానుంది. ఆ తర్వాత పుణేలో కీలక సన్నివేశాలను నెల రోజుల పాటు చిత్రీకరించనున్నారు. రూ. 90 కోట్లతో నిర్మితమవుతున్న ఈ సినిమాకు హారిష్ జైరాజ్ సంగీతం అందిస్తుండగా, జాతీయ అవార్డు గ్రహీత సంతోష్ శివన్ సినిమాటోగ్రాఫర్ గా పనిచేస్తున్నారు.
