Stolen Review in Telugu: స్టోలెన్ సినిమా రివ్యూ & రేటింగ్!

ఆ సమయంలో తమ్ముడిని నిరపరాధిగా ప్రూవ్ చేసి ఆ కేస్ నుంచి బయటపడాలంటే.. ఉన్న ఒకే ఒక్క దారి ఆ పసిబిడ్డను కనిపెట్టడం. దాంతో లోకల్ పోలీసులు, జంపా తో కలిసి గౌతమ్ & రమణ్ ఆ చిన్నారిని వెతకడం మొదలుపెడతారు.

ఈ క్రమంలో వాళ్లు ఎదుర్కొన్న ఇబ్బందులు ఏమిటి? తెలుసుకున్న జీవిత సత్యాలు ఏమిటి? చుట్టూ ఉన్న ప్రజలు లేదా సమాజం వాళ్లకి సహాపడ్డారా లేక ఆటంకంగా నిలిచారా? వంటి ప్రశ్నలకు సమాధానమే “స్టోలెన్” (Stolen) చిత్రం.

నటీనటుల పనితీరు: ఇప్పటివరకు అభిషేక్ బెనర్జీని ఎక్కువగా కామెడీ రోల్స్ లో చూసాం, “పాతాళ్ లోక్”లో మరీ సీరియస్ రోల్. అలాంటిది ఈ సినిమాలో ఒక రెగ్యులర్ రోల్ అయినప్పటికీ.. ఆ పాత్రలో ఎన్నో ఎమోషన్స్. పాత్ర చుట్టూ భీభత్సమైన డ్రామా నడుస్తుంటుంది. ఆ డ్రామాకి తగ్గట్లుగా అభిషేక్ పండించనే భావాలు ఒకపక్క భయం పుట్టిస్తూనే, మరోపక్క ఆలోచింపజేస్తాయి. ఇంత కాంప్లెక్స్ క్యారెక్టర్ ను ఈమధ్యకాలంలో చూసి ఉండం.

అలాగే.. జంపా అనే తల్లి పాత్రలో మియా అద్భుతంగా ఒదిగిపోయింది. ఆమె క్యారెక్టర్ చుట్టూ జరిగే డ్రామా, ఆ క్యారెక్టర్ ద్వారా క్రియేట్ అయ్యే టెన్షన్, రివీల్ అయ్యే ట్విస్టులు కథను మరింత రంజింపజేస్తాయి. మన సమాజంలో మనుషులు వ్యవహరించే తీరుకు జంపా, ఆమె కూతురు చంపా పాత్రలు చెంపపెట్టుగా ఉంటాయి.

సినిమాలో మోస్ట్ ఇంట్రస్టింగ్ క్యారెక్టర్ రమణ్ పాత్ర పోషించిన శుభం వర్ధన్ ది. ఒక మనిషి ఎలా ఉండాలి, ఎంత బాధ్యతగా ఉండాలి, సమాజాన్ని ఎలా ఎదుర్కోవాలి వంటి ఎన్నో అంశాలను ఈ పాత్ర ద్వారా చెప్పుకొచ్చాడు దర్శకుడు. అతడి కళ్లల్లో అంతే ధైర్యం కనిపిస్తుంది.

మిగతా పాత్రధారులు కూడా ఎంతో సహజంగా ఒదిగిపోయారు. ప్రతి ఒక్క పాత్ర చాలా చక్కగా ఉంటుంది.

సాంకేతికవర్గం పనితీరు: ఈ సినిమాకి మెయిన్ ఎస్సెట్ సినిమాటోగ్రఫీ & బ్యాగ్రౌండ్ ఆర్టిస్టులు. సినిమాలో కనిపించే బ్యాగ్రౌండ్ ఆర్టిస్టులు ఎంత ఇంటెన్సిటీ క్యారీ చేస్తే సన్నివేశం, అందులోని ఎమోషన్ అంత అద్భుతంగా పండుతుంది అనేందుకు ఈ చిత్రం సరైన ఉదాహరణగా నిలుస్తుంది. ప్రీక్లైమాక్స్ లో ఒక సీరియస్ సీన్ నడుస్తుంటుంది, ఏ ఒక్క ఫ్రేమ్ లోనూ సీరియస్ గా లేని ఒక్క జూనియర్ ఆర్టిస్ట్ కనిపించడు. దర్శకుడు ఎంత జాగ్రత్తగా సినిమాను తెరకెక్కించాడు అనేందుకు ఇది ఒక చిన్న శాంపిల్ మాత్రమే. సినిమాటోగ్రఫీ, ఎడిటింగ్, డి.ఐ వంటి టెక్నికాలిటీస్ అన్నీ అద్భుతంగా కుదిరాయి. సన్నివేశాలు ఎంత సహజంగా ఉన్నాయంటే.. జనాలకి తెలియకుండా కెమెరా పెట్టి రికార్డ్ చేసినట్లుగా ఉంటుంది.

దర్శకుడు కరణ్ తేజ్ పాల్ ఈ సినిమాలో ఎక్కడా పాత్రల పరిచయాలని, క్యారెక్టర్ ఎస్టాబ్లిష్మెంట్ అనీ ఒక్క ఫ్రేమ్ కూడా వేస్ట్ చేయలేదు. ఓపెనింగ్ సీక్వెన్స్ నుంచే కథలోకి వెళ్లిపోయాడు. పాత్ర స్వభావాలను కూడా కథలో భాగంగానే పరిచయం చేయడం అనేది కథా గమనానికి ఎక్కడా బ్రేక్ వేయలేదు, స్లో చేయలేదు. అలాగే.. వాట్సాప్ లేదా సోషల్ మీడియాలో కనిపించే వార్తలను, వీడియోలను చూసి నిజం అనుకునే సమాజం చేసే పిచ్చి పనులు ఎంత ప్రమాదకరంగా ఉంటాయి, అలాగే గుంపు మనస్తత్వం సమాజానికి ఎంత చేటు అనేది ఈ సినిమాలో చాలా స్పష్టంగా చూపించారు. “అనుకోకుండా ఒకరోజు” తర్వాత మాబ్ మెంటాలిటీని సరిగ్గా పిక్చరైజ్ చేసిన చిత్రం “స్టోలెన్” అని చెప్పొచ్చు. ఇలా సమాజాన్ని ప్రశ్నించిన అంశాలు ఎన్నో ఉన్నాయి. అన్నీ హార్డ్ హిట్టింగ్ గానే ఉంటాయి. ఎన్నో సినిమాలకి అసిస్టెంట్ డైరెక్టర్ గా వర్క్ చేసిన కరణ్ తేజ్ పాల్ ఈ సినిమాతో దర్శకుడిగా పరిచయమయ్యాడు. అతడి దృష్టికోణం కచ్చితంగా ప్రస్తుత సమాజానికి చాలా అవసరం. కరణ్ ఈ తరహా సినిమాలు మరెన్నో తెరకెక్కించి, సమాజాన్ని ఆలోచింపజేయాలి.

విశ్లేషణ: కొన్ని సినిమాలు మన ఆలోచనాధోరణిని, మన చుట్టూ ఉన్న మనుషుల వ్యక్తిత్వాల్ని ప్రశ్నించేలా చేస్తాయి. అలాంటి ఒక సినిమానే “స్టోలెన్”. అభిషేక్ బెనర్జీ నటన, కరణ్ తేజ్ పాల్ దర్శకత్వ ప్రతిభ కోసం ఈ చిత్రాన్ని కచ్చితంగా చూడాల్సిందే. ప్రస్తుతానికి కేవలం హిందీలో మాత్రమే స్ట్రీమ్ అవుతున్న ఈ చిత్రాన్ని ప్రైమ్ సంస్థ త్వరలోనే అన్నీ భాషల్లో అనువదిస్తే బాగుంటుంది.

ఫోకస్ పాయింట్: సమాజాన్ని ఆలోచింపజేసే “స్టోలెన్”.

రేటింగ్: 3.5/5