Yuganiki Okkadu: యుగానికి ఒక్కడు.. ఎక్స్ ట్రా 30 నిమిషాల్లో ఏముంది?

టాలీవుడ్ ఇండస్ట్రీలో కార్తీ (Karthi) నటించిన యుగానికి ఒక్కడు (Yuganiki Okkadu) సినిమాకు ప్రత్యేకమైన స్థానం ఉంది. 2010లో విడుదలైన ఈ సినిమా తెలుగులో పెద్ద విజయాన్ని సాధించడంతో పాటు, కార్తీకి టాలీవుడ్‌లో మంచి ఫాలోయింగ్ తెచ్చిపెట్టింది. ఇప్పుడు, 15 ఏళ్ల తర్వాత, ఈ సినిమాను మార్చి 14న రీరిలీజ్ చేయబోతున్నారు. అయితే ఈసారి ప్రేక్షకులకు అసలు సిసలు అనుభూతిని అందించేందుకు అన్‌కట్ వెర్షన్‌ను ప్రదర్శించనున్నారు. ఈ సినిమా షూటింగ్ మొదలైన 2007 నుంచి విడుదలైన 2010 వరకు మూడేళ్లు పట్టింది.

Yuganiki Okkadu

కథాంశం విభిన్నంగా ఉండటంతో పాటు, గ్రాండ్ విజువల్స్ కారణంగా ఈ ఆలస్యం ఏర్పడింది. మొదట దర్శకుడు సెల్వ రాఘవన్ (Selvaraghavan) 3 గంటల 1 నిమిషం నిడివితో సినిమాను రిలీజ్ చేయాలని భావించాడు. కానీ, థియేట్రికల్ రన్‌లో మొదటి రోజే మిక్స్‌డ్ టాక్ రావడంతో, రెండో రోజునే దాన్ని 2 గంటల 34 నిమిషాల నిడివికి కుదించాల్సి వచ్చింది. ఇప్పుడు తిరిగి రిలీజ్ కానున్న అన్‌కట్ వెర్షన్‌లో అదనంగా 30 నిమిషాల సన్నివేశాలు హైలెట్ అవుతున్నాయి.

ముఖ్యంగా చోళ రాజు, అనిత (రీమా సేన్) (Reema Sen) మధ్య డిలీటెడ్ సాంగ్, యుద్ధ దృశ్యాలు, కొన్ని ఇంటెన్స్ సన్నివేశాలు కలిపి మెరుగైన అనుభూతిని ఇవ్వనున్నాయి. 90 రోజులు పాటు షూట్ చేసిన గుహల సన్నివేశాల్లో 2000 మందికిపైగా జూనియర్ ఆర్టిస్టులు పాల్గొనడం విశేషం. ఈ సినిమాకు జీవీ ప్రకాష్ (G. V. Prakash Kumar) అందించిన బ్యాక్‌గ్రౌండ్ స్కోర్ అంతగా గుర్తుండిపోయింది. ఆసక్తికరంగా, యుగానికి ఒక్కడు మ్యూజిక్ చూసిన తర్వాతే అతనికి మంచి అవకాశాలు వచ్చాయి.

ఇక ఈ సినిమా సీక్వెల్‌ పై కూడా దర్శకుడు సెల్వ రాఘవన్ ఆసక్తికరమైన సంకేతాలు ఇచ్చినప్పటికీ, ఇప్పటి వరకు అధికారిక అప్డేట్ రాలేదు. ఈసారి రీరిలీజ్‌లో ప్రేక్షకులు అసలు ఫీల్‌ని ఎంజాయ్ చేయనున్నారని, 15 ఏళ్ల తర్వాత కూడా సినిమా మేజిక్ కంటిన్యూ అవుతుందని విశ్లేషకులు భావిస్తున్నారు.