బరేలీ కి బర్ఫీ సినిమాను రీమేక్ చేయనున్న కోనా వెంకట్!

సొంత కథలు తక్కువయ్యాయో లేక కథలు రాయడానికి రచయితలకు కాన్సెప్టులు దొరకడం లేదో తెలియదు కానీ.. ఈమధ్యకాలంలో రీమేక్ ల సంఖ్య ఎక్కువైంది. పరాయి భాషలో సూపర్ హిట్ అయిన సినిమాలను మాత్రమే కాదు.. యావరేజ్ గా ఆడిన సినిమాలను కూడా రీమేక్ చేసేస్తున్నారు మన తెలుగు దర్శకనిర్మాతలు. మొన్నామధ్య ఓ తమిళ చిత్రాన్ని “నీవెవరో” అనే టైటిల్ తో రీమేక్ చేసిన కోన వెంకట్ ఇప్పుడు మళ్ళీ మరో బాలీవుడ్ చిత్రాన్ని రీమేక్ చేసేందుకు సన్నద్ధమవుతున్నాడు.

రాజ్ కుమార్ రావు, కృతిసనన్, ఆయుష్మాన్ ఖురానా హీరోహీరోయిన్లుగా తెరకెక్కిన ఈ చిత్రం హిందీలో యావరేజ్ గా నిలిచింది. కానీ.. కాన్సెప్ట్ మాత్రం తెలుగులో విడుదలైన చాలా పాత సినిమాలను తలపిస్తుంది. కాకపోతే.. సినిమా కాస్త పోయిటిక్ గా ఉంటుంది. ఇప్పుడు ఈ చిత్రాన్ని తెలుగులో కోన వెంకట్ రీమేక్ చేద్దామనుకుంటున్నాడు. ఇద్దరు యువ కథానాయకులతో.. మల్టీస్టారర్ గా ఈ సినిమాను రూపొందించడానికి సన్నాహాలు చేస్తున్నాడు కోన. మరి ఆ ఇద్దరు హీరోలెవరు? సినిమా ఎప్పటికీ మొదలవుతుంది అనేది తెలియాల్సి ఉంది.