సంధ్య థియేటర్ వద్ద జరిగిన తొక్కిసలాట ఘటన, సినీ నటుడు అల్లు అర్జున్ (Allu Arjun) అరెస్ట్ విషయమై ఆంధ్రప్రదేశ్ ఉప ముఖ్యమంత్రి పవన్ కల్యాణ్ (Pawan Kalyan) స్పందించారు. గుంటూరులో మీడియాతో మాట్లాడిన పవన్, ఈ ఘటనపై తన అభిప్రాయాలను వెల్లడించారు. రేవతి అనే మహిళ మరణం బాధాకరమని, ఇలాంటి ఘటనలు సినిమా పరిశ్రమకు మంచి పేరు తీసుకురావని ఆయన వ్యాఖ్యానించారు. ‘‘సినిమా ఒక టీమ్ వర్క్. థియేటర్ వద్ద జరిగిన ఘటనకు కేవలం అల్లు అర్జున్ను మాత్రమే బాధ్యుడిగా చూపించడం సరికాదు. యూనిట్ మొత్తం బాధ్యత వహించాలి.
రేవతి మరణం గురించి విన్నప్పుడు నా మనసు ఎంతో కలచిపోయింది. ఇలాంటి విషాద ఘటనలు అభిమానుల ఆత్మస్థైర్యాన్ని దెబ్బతీస్తాయి. అల్లు అర్జున్ తరఫున ఎవరో బాధిత కుటుంబాన్ని ముందే పరామర్శించి ఉంటే ఇంతటి వివాదం ఉండేది కాదు. గోటితో పోయే దాన్ని గొడ్డలి వరకూ తెచ్చారు. మానవతా దృక్పథం లోపించినట్లు అనిపించింది. బాధిత కుటుంబానికి సానుభూతి తెలిపి, మనమంతా అండగా ఉన్నామని చెప్పాల్సిన అవసరం ఉంది’’ అని పవన్ అన్నారు. అలాగే, తెలంగాణ ముఖ్యమంత్రి రేవంత్ రెడ్డిపై తన అభిప్రాయాన్ని వ్యక్తం చేస్తూ, ‘‘రేవంత్ రెడ్డి డైనమిక్ లీడర్.
వైకాపా విధానాల తరహాలో అక్కడ వ్యవహరించలేదు. ఆయన చిత్ర పరిశ్రమకు పూర్తిగా సహకరిస్తున్నారు. ‘సలార్’ (Salaar), ‘పుష్ప2’ (Pushpa 2: The Rule) వంటి సినిమాలకు భారీ వసూళ్లు వచ్చాయి. ‘పుష్ప2’ సినిమాకు సీఎం రేవంత్ పూర్తిగా సహకరించారు. బెనిఫిట్ షోలకు అనుమతులు ఇవ్వడం, టికెట్ ధరల పెంపుకు వెసులుబాటు కల్పించడం వంటి చర్యలతో పరిశ్రమను ప్రోత్సహించారు. కానీ ఈ ఘటనలో పోలీసుల తీరును తప్పుబట్టను, థియేటర్ యాజమాన్యం మరింత జాగ్రత్తగా వ్యవహరించి ఉండాల్సింది’’ అని పేర్కొన్నారు.పవన్ కల్యాణ్ సినిమా పరిశ్రమలో మార్పు అవసరాన్ని ఉటంకిస్తూ, ‘‘సినిమా పరిశ్రమలో క్వాలిటీని పెంపొందించేందుకు కొత్త ఆవిష్కరణలు అవసరం.
రాష్ట్రంలోని పాపికొండలు, విజయనగరం అటవీ ప్రాంతాల వంటి అందమైన లొకేషన్లను ఉపయోగించుకోవాలి. ఫిల్మ్ మేకింగ్ స్కూల్స్, స్టోరీ టెల్లింగ్ వర్క్షాప్లు స్థాపించి నూతన ప్రతిభను ప్రోత్సహించాలి. అప్పుడు మాత్రమే సినిమా పరిశ్రమ స్థిరత్వం సాధిస్తుంది’’ అని అభిప్రాయపడ్డారు. ఈ ఘటనపై బాధ్యతతో స్పందించిన పవన్ కల్యాణ్ వ్యాఖ్యలు ఇప్పుడు చర్చనీయాంశమయ్యాయి. థియేటర్ యాజమాన్యం, చిత్ర యూనిట్ కలిసి బాధిత కుటుంబానికి న్యాయం చేయాల్సిన అవసరం ఉందని పవన్ చేసిన వ్యాఖ్యలు సమాజానికి గమనార్హంగా నిలుస్తాయి.
