DJ Tillu: ‘డీజే టిల్లు’ సీక్వెల్ కి డైరెక్టర్ దొరికేశాడు!

July 24, 2022 / 10:10 PM ISTByFilmy Focus

Join Us

DJ Tillu: ‘డీజే టిల్లు’ సీక్వెల్ కి డైరెక్టర్ దొరికేశాడు!

ఎలాంటి అంచనాలు లేకుండా విడుదలై భారీ విజయాన్ని అందుకుంది ‘డీజే టిల్లు’ సినిమా. ఈ సినిమాతో సిద్ధూ జొన్నలగడ్డకి మంచి క్రేజ్ వచ్చింది. అతడి మార్కెట్ రేంజ్ పెరిగింది. చాలా కాలంగా ఎదురుచూస్తోన్న సక్సెస్ ఈ సినిమాతో రావడంతో.. ఇప్పుడు దీనికి సీక్వెల్ కూడా ప్లాన్ చేస్తున్నారు సిద్ధూ జొన్నలగడ్డ. స్క్రిప్ట్ పనుల్లో అతడు కూడా ఇన్వాల్వ్ అవుతున్నారు. ఈసారి కాస్త ఎక్కువ బడ్జెట్ తో మరింత ఫన్ గా సినిమాను తీయబోతున్నారు.

అయితే ఈ సినిమా నుంచి దర్శకుడు విమల్ కృష్ణ తప్పుకున్నారు. ఆయనకు వేరే కమిట్మెంట్స్ ఉండడం వలన సీక్వెల్ ను డైరెక్ట్ చేయలేకపోతున్నారు. దీంతో సిద్ధూ జొన్నలగడ్డే ఈ సినిమాను డైరెక్ట్ చేస్తారనే మాటలు వినిపించాయి. కానీ అలా జరగడం లేదు. ఈ సినిమా కోసం కొత్త డైరెక్టర్ ని వెతికే పనిలో పడ్డారు. ఈ క్రమంలో వారికొక డైరెక్టర్ దొరికినట్లు తెలుస్తోంది. అతడు మరెవరో కాదు.. మల్లిక్ రామ్.

తేజ సజ్జా, శివానీ రాజశేఖర్ జంటగా తెరకెక్కిన ‘అద్భుతం’ అనే సినిమాను రూపొందించారు మల్లిక్ రామ్. ఓటీటీలో విడుదలైన ఈ సినిమాకి మంచి టాక్ వచ్చింది. ఇప్పుడు ఈ దర్శకుడికి ‘డీజే టిల్లు’ సీక్వెల్ బాధ్యతలు అప్పగించబోతున్నారు. త్వరలోనే ఈ విషయంపై అధికార ప్రకటన రానుంది.

ప్రస్తుతం ఈ సినిమాకి సంబంధించిన స్క్రిప్ట్ వర్క్ జరుగుతోంది. ఈ డిస్కషన్స్ లో మల్లిక్ కూడా పాల్గొంటున్నారు. ఫస్ట్ పార్ట్ లో నేహాశెట్టి హీరోయిన్ గా కనిపించింది. ఇప్పుడు సీక్వెల్ లో మరో హీరోయిన్ ను తీసుకోబోతున్నారు. నేహాశెట్టి గెస్ట్ రోల్ లో కనిపిస్తుందని సమాచారం. ఈ సినిమాలో నటించడంతో పాటు కథ, మాటలు అందిస్తున్నారు సిద్ధూ జొన్నలగడ్డ.