2023లో నెట్ ఫ్లిక్స్ లో విడుదలైన “రానా నాయుడు” (Rana Naidu) సృష్టించిన సెన్సేషన్ ను అంత ఈజీగా మర్చిపోలేం. సినిమా కంటెంట్ కంటే.. సినిమాలోని బూతులు, శృతి మించిన శృంగార సన్నివేశాలు ఎక్కువ హల్ చల్ చేశాయి. వెంకటేష్ (Venkatesh) వీరాభిమానులైన ఫ్యామిలీ ఆడియన్స్ ఈ సిరీస్ విషయంలో చాలా హర్ట్ అయ్యారు. ఆ విషయాన్ని వెంకటేష్ కూడా కాస్త సీరియస్ గానే తీసుకున్నారు. అసలు ఈ సెకండ్ సీజన్ అనేది ఉండదు అనుకున్నారు చాలామంది. కట్ చేస్తే.. సీజన్ 2 అనౌన్స్ చేశారు. ఇవాళ (జూన్ 13) విడుదలైన ఈ సీజన్ 2 ఎలా ఉందో చూద్దాం..!!
కథ: కథగా ఇది ప్రోపర్ సీక్వెల్. సీజన్ 1 ఎక్కడ ముగిసిందో, సరిగ్గా అక్కడినుంచే మొదలయ్యింది సీజన్ 2. ఓబీ మహాజన్ దగ్గర నుంచి బయటికి వచ్చిన రానా నాయుడు (రానా దగ్గుబాటి) భార్య, పిల్లలతో కలిసి ప్రశాంతమైన జీవితం గడపాలి అనుకుంటాడు. అంతా సెట్ అయ్యింది అనుకున్న తరుణంలో కొడుకుని కిడ్నాప్ చేశారని తెలుస్తుంది. దాంతో మళ్లీ రంగంలోకి దిగుతాడు రానా.
తన కొడుకును కాపాడుకునే క్రమంలో కొంతమందిని చంపేస్తాడు, దాంతో రౌఫ్ “అర్జున్ రాంపాల్” రంగంలోకి దిగుతాడు. డైరెక్ట్ గా రానా నాయుడ్ని ఎటాక్ చేస్తాడు.
ఈ రానా వర్సెస్ రౌఫ్ ప్రచ్ఛన్న యుద్ధంలో.. నాగ (వెంకటేష్) మధ్యలోకి వస్తాడు.
ఈ వైల్డ్ వార్ లో రానా నాయుడు ఎలా నిలబడ్డాడు? తన కుటుంబాన్ని ఎలా కాపాడుకున్నాడు? అనేది “రానా నాయుడు సీజన్ 2” (Rana Naidu Season 2) స్టోరీ.
నటీనటుల పనితీరు: ఎప్పట్లానే.. రానా సిరీస్ లో అందర్నీ డామినేట్ చేసేసాడు. తనదైన స్క్రీన్ ప్రెజన్స్ & పర్సనాలిటీతో సిరీస్ కి హైలైట్ గా నిలిచాడు. మొదటి సీజన్ లో బూతులు, శృంగార సన్నివేశాల మోతాదు ఎక్కువయ్యిందని ఫీడ్ బ్యాక్ ను సీరియస్ గా తీసుకున్నట్లున్నాడు రానా. సెకండ్ సీజన్ లో ఒక్కటంటే ఒక్క శృంగార సన్నివేశం కూడా లేకుండా జాగ్రత్తపడ్డాడు. కనీసం ముద్దు సీన్ కూడా లేకపోవడం గమనార్హం. అలాగే.. ఎమోషనల్ సీన్స్ లోనూ చక్కని నటనతో ఆకట్టుకున్నాడు రానా.
వెంకటేష్ (Venkatesh) కూడా ఈ సీజన్ లో బూతులు తగ్గించాడు. తన వీరాభిమానులైన ఫ్యామిలీ ఆడియన్స్ ఇబ్బందిపడే స్థాయి మాటలు కానీ సన్నివేశాలు కానీ ఈ సీజన్ లో ఏమీ లేకపోవడం విశేషం. అయితే.. మిగతా కీ క్యారెక్టర్స్ తో కంపేర్ చేస్తే, వెంకటేష్ క్యారెక్టర్ అంతగా వర్కవుట్ అవ్వలేదనే చెప్పాలి. కాకపోతే.. “ఎఫ్ 1, ఎఫ్ 2” సినిమాల్లోని వెంకీ ఆసనాన్ని ఈ సిరీస్ లోనూ ట్రై చేయడం మరియు తనదైన కామెడీ టైమింగ్ తో నవ్వించే ప్రయత్నం కూడా చేశాడు.
అర్జున్ రాంపాల్ ను విలన్ గా ప్రొజెక్ట్ చేసి మంచి హైప్ ఇచ్చినప్పటికీ.. ఆ క్యారెక్టర్ ఆర్క్ సోసోగా ఉండడంతో సరిగ్గా ఎలివేట్ అవ్వలేదు. మరీ ముఖ్యంగా ఆఖరి ఎపిసోడ్ లో చంపేయాలి కాబట్టి చంపేసినట్లుగా ఉంటుంది తప్పితే సరైన జస్టిఫికేషన్ ఉండదు.
సుర్వీన్ చావ్లా గ్లామర్ యాడ్ చేసింది, అయితే.. ఎందుకని అలా బిహేవ్ చేస్తుంది, రానాని (Rana Daggubati) ఎందుకు చీట్ చేస్తుంది అనేందుకు సరైన సమాధానం లేదు. ఇక కృతి కర్బంద పాత్ర కూడా అదే తరహాలో ఉంటుంది. మిగతా నటీనటులందరూ కంటిన్యూటీతో పర్వాలేదనిపించుకున్నారు.
సాంకేతికవర్గం పనితీరు: సినిమాటోగ్రఫీ వర్క్ డీసెంట్ గా ఉంది కానీ.. సెట్ వర్క్ మాత్రం అసహజంగా ఉంది. చాలా సన్నివేశాల్లో బ్యాగ్రౌండ్ సెట్ అనేది క్లియర్ గా కనిపిస్తుంది. నెట్ ఫ్లిక్స్ లాంటి ప్రొడక్షన్ హౌస్ ఏమాత్రం కేర్ తీసుకోకపోవడం గమనార్హం. యాక్షన్ బ్లాక్ కూడా చాలా నీరసంగా ఉన్నాయి. డి.ఐ విషయంలో సరైన కేర్ తీసుకోకపోవడం వల్ల బ్లడ్ కూడా చాలా అసహజంగా కనిపించింది. ఈ విషయాలన్నీ సిరీస్ కి మైనస్ గా మారాయి.
ఈ సిరీస్ ను అమెరికన్ టీవీ సిరీస్ “రేయ్ డోనోవాన్” నుంచి స్ఫూర్తి పొంది తెరకెక్కించినప్పటికీ.. ఇండియన్ నేటివివిటీకి తగ్గట్లుగా మార్పులు చేశారు. అయితే… మొదటి సీజన్ కు వెంకటేష్ ఫ్యాన్స్ నుంచి వచ్చిన రెస్పాన్స్ ను జాగ్రత్తగా గమనించి సెకండ్ సీజన్ లో ఎలాంటి అనవసరమైన బూతులు, అసభ్యకరమైన శృంగార సన్నివేశాలు లేకుండా జాగ్రత్తపడ్డారు. మరీ ముఖ్యంగా.. ఉన్న కొద్దిపాటి బూతులు కూడా హిందీలోనే ఉండడం అనేది కాస్త ఆడియన్స్ ను ఇబ్బందిపెట్టని విషయం. అలాగే.. సెకండ్ సీజన్ కి వచ్చేసరికి డ్రామాకి పెద్ద పీట వేయడం కూడా కొంచం ప్లస్ అయ్యింది. ఓవరాల్ గా ఫస్ట్ సీజన్ రేంజ్ ఎగ్జైట్మెంట్ క్రియేట్ లేకపోయినా, ఓ మోస్తరుగా ఆకట్టుకుంది “రానా నాయుడు” వెబ్ సిరీస్.
విశ్లేషణ: బూతులు వినిపించని, బూతు బొమ్మలు కనిపించని రానా నాయుడు సీజన్ 2. అందుకు కారణం కచ్చితంగా వెంకటేష్, రానా పర్సనల్ కేర్ తీసుకోవడమే. మొదటి సీజన్ కి వచ్చిన ఫీడ్ బ్యాక్ అలాంటిది మరి. అందుకే.. ఈ సీజన్ లో విలన్ పాత్రతో ఒక సెల్ఫ్ ట్రోల్ కూడా ఉంటుంది, ఇంట్లో బూతులు మాట్లాడకూడదు అని సాగే ఆ సీక్వెన్స్ బాగా పేలింది. అయితే.. బోలెడన్ని పాత్రలు, చాలా పెద్ద కాన్వాస్, మంచి ఫ్యామిలీ డ్రామా ఉన్నప్పటికీ.. వీటన్నిటినీ బ్యాలెన్స్ చేసే స్క్రీన్ ప్లే & ఎమోషన్ మిస్ అవ్వడంతో ఈ సిరీస్ పూర్తిస్థాయిలో అలరించలేకపోయింది.
ఫోకస్ పాయింట్: ఫ్యామిలీ ఆడియన్స్ ను హర్ట్ చేయని సీజన్ 2!
రేటింగ్: 2.5/5
Home
