Sourav Ganguly: సౌరభ్‌ జీవితం… తెరపైకి మంచి కమర్షియల్‌ హిట్‌ పక్కా!

టీమిండియా క్రికెట్‌ చరిత్రలో కనీసం ఒక్క పేజీ అయినా ఉంటే చాలు అనుకుంటుంటారు మన క్రికెటర్లు. అలాంటి పేజీ ఏం ఖర్మ… ఏకంగా పేజీలు పేజీలు రాసి పెట్టున్నాయ్‌ ఆ ఆటగాడికి. టీమిండియా క్రికెట్‌కు వేగం, తెగువ చూపించిన ఆ క్రికెటరే సౌరభ్‌ గంగూలీ. ఇప్పుడు ఆయన మీద సినిమా తీయడానికి బాలీవుడ్‌ దర్శకుడు ఒకరు సిద్ధమవుతున్నారు. ఈ సినిమా కచ్చితంగా పాన్‌ ఇండియానే అవుతుంది. అయితే మరి ఈ సినిమాలో ఏమేం చూపించబోతున్నారు. ఇదే ఈ రోజు పాయింట్‌.

* క్రికెటర్లలో గంగూలీది భిన్నమైన మసస్తత్వం అంటారు. చెప్పాలనుకున్న మాటను తర్వాతి పరిణామాలను పట్టించుకోకుండా అనేస్తుంటాడు. అలా ఓ సమయంలో జట్టు యాజమాన్యంతో విభేదించి నాలుగేళ్లు (1992 నుండి 1996) టీమిండియా జెర్సీకి దూరమయ్యాడు.

* ప్రతిష్ఠాత్మక లార్డ్స్‌ మైదానంలో గంగూలీకి గొప్ప రికార్డులు ఉన్నాయి. అంతేకాదు అదే మైదానంలో నాట్‌వెస్ట్‌ ట్రోఫీ గెలుచుకున్నాక జెర్సీ తీసి గాల్లో ఊపుతూ విజయానందం ప్రదర్శించాడు. దానిపై అప్పట్లో దుమారం రేగింది. కానీ అవేవీ దాదా పట్టించుకోలేదు.

* 199-2000లో టీమ్‌ఇండియా స్పాట్‌ఫిక్సింగ్‌ కుంభకోణంలో ఇరుక్కోవడంతో.. గంగూలీ అనుకోకుండానే కెప్టెనయ్యాడు. జట్టును ఏకతాటిపైకి తీసుకొచ్చి అందరి మన్ననలు పొందాడు. చిన్న వయసులోనే పరిణితి చూపించి, కీలక సమయంలో జట్టును సమతూకంగా నడిపి శభాష్‌ అనిపించుకున్నాడు.

* 2005లో టీమ్‌ఇండియా ప్రధాన కోచ్‌గా గ్రేగ్‌ ఛాపెల్‌ను తీసుకురావడంలో గంగూలీ కీలక పాత్రపోషించాడు. విదేశీ కోచ్‌ అయితే బాగుంటుందని బీసీసీఐకి నచ్చజెప్పి మరీ ఛాపెల్‌ను తీసుకొచ్చాడు. అయితే, తర్వాతి కాలంలో అతడి వల్లే జట్టు నుంచి దూరం కావడం గమనార్హం.

* విజయవంతమైన ఆటగాడిగా జట్టులో కొనసాగుతున్న సమయంలోనే వివిధ కారణాల వల్ల… 2008లో ఆటకు గుడ్‌బై చెప్పాడు దాదా. ఆ తర్వాత బెంగాల్‌ క్రికెట్‌ అధ్యక్షుడిగా ఎన్నికయ్యాడు. అ తర్వాత బీసీసీఐ బాస్‌గా కొనసాగుతున్నాడు. ఇందులోనూ తనదైన దూకుడు చూపిస్తున్నాడు.

* గంగూలీ జీవితం బయోపిక్‌గా వెండితెరపైకి రానున్న నేపథ్యంలో ఆ పాత్ర ఎవరు పోషిస్తారు అనే ప్రశ్న వినిపిస్తోంది. అయితే ఓ సందర్భంలో దాదా మాట్లాడుతూ… తన బయోపిక్‌లో హృతిక్‌ రోషన్‌ ప్రధాన పాత్ర నటిస్తే బాగుంటుంది అన్నాడు. మరి హృతిక్‌ ఏమంటాడో చూడాలి. అయితే అభిమానులు, నెటిజన్లు మాత్రం రణ్‌బీర్‌ కపూర్‌ అంటున్నారు.

* ఇది కాకుండా చర్చకు వస్తున్న మరో అంశం ఈ సినిమాలో సచిన్‌ ఎవరు అని. దాదా కెరీర్‌లో సచిన్‌ చాలా కీలకం. సచిన్‌ లేకుండా కొన్ని సీన్స్‌ ముందుకెళ్లవు. మరి ఆ పాత్రలో ఎవరు నటిస్తారు అనేదీ కీలకం.

* గంగూలీకి… ఓ కథానాయికతో అఫైర్‌ ఉంది అంటూ ఆ రోజుల్లో గట్టిగా పుకార్లు వినిపించేవి. వాటిపై ఎవరూ అధికారికంగా స్పందించింది లేదు. మరి వాటిని ఈ బయోపిక్‌లో టచ్‌ చేసి… ఏమన్నా క్లారిటీ ఇస్తారేమో చూడాలి.

* దీంతోపాటు గంగూలీది ప్రేమ వివాహం. చిన్ననాటి స్నేహితురాలు డోనాను ప్రేమించి పెళ్లి చేసుకున్నారు. తొలినాళ్లలో వీరి వివాహానికి పెద్దలు అంగీకరించలేదట. ఈ ప్లాట్‌లన్నీ చూస్తుంటే ఒక కమర్షియల్‌ సినిమాకు కావాల్సిన అన్ని హంగులు దాదా లైఫ్‌లో ఉన్నాయి. మరి వాటిని ఎలా తెరపై పండిస్తారో చూడాలి.

నెట్ సినిమా రివ్యూ & రేటింగ్!

Most Recommended Video

టక్ జగదీష్ సినిమా రివ్యూ & రేటింగ్!
సీటీమార్ సినిమా రివ్యూ & రేటింగ్!
తలైవి సినిమా రివ్యూ & రేటింగ్!