జూన్ 26న కబాలి ఆడియో రిలీజ్

సూపర్ స్టార్ రజనీకాంత్ గ్యాంగ్ స్టార్ గా మరోసారి నటించిన చిత్రం కబాలి. ఈ చిత్ర టీజర్ లో రజనీ స్టైల్ చూసి అందరూ ఫిదా అయిపోతున్నారు. ఈ వీడియోను ఇప్పటికే 2 కోట్ల 20 లక్షల మంది చూసారు. ఇంత క్రేజ్ ఉన్నా ఈ చిత్రం తమిళ్ ఆడియోని ఎటువంటి హంగామా లేకుండా జూన్ 12న రిలీజ్ చేసారు. సంతోష్ నారాయణ్ ఇచ్చిన పాటలు చిన్న, పెద్ద లేకుండా అందరికీ నచ్చాయి. తెలుగులో ఈ పాటలకు రామజోగయ్య శాస్త్రి, అనంత్ శ్రీరాం, వనమాలి అద్భుతమైన సాహిత్యాన్ని అందించారు.

ఆంధ్రప్రదేశ్, తెలంగాణలో రజనీ కాంత్ కి ఉన్న ఫాలోయింగ్ ని దృష్టిలో ఉంచుకుని ఈ చిత్ర ఆడియో రిలీజ్ వేడుకను ఈ నెల 26 న గ్రాండ్ గా నిర్వహించనున్నట్లు నిర్మాతలు కె.పి.చౌదరి, కె.ప్రవీణ్ కుమార్ చెప్పారు. ఈ కార్యక్రమానికి తెలుగు చిత్ర పరిశ్రమకు చెందిన పలువురు ప్రముఖులు హాజరుకానున్నట్లు చెప్పారు.

కలైపులి థాను సమర్పణలో షణ్ముక ఫిలింస్ బ్యానర్ పై పా.రంజిత్ దర్శకత్వంలో రూపొందుతోన్నఈ చిత్రంలో రజనీకాంత్ సరసన రాధికా అప్టే హీరోయిన్ గా నటించింది. ఈ సినిమా రిలీజ్ డేట్ ను త్వరలో ప్రకటించనున్నారు.