మహేష్ బాబు హీరోగా వంశీ పైడిపల్లి డైరెక్షన్లో ‘మహర్షి’ చిత్రం రూపొందిన సంగతి తెలిసిందే. మే 9న ఈ చిత్రం విడుదల కానుంది. ఈ చిత్రం మహేష్ కు 25 వ చిత్రం కావడం అందులోనూ 3 డిఫరెంట్ షేడ్స్ లో మహేష్ ఈ చిత్రంలో కనిపించనుండడంతో ప్రేక్షకుల్లో ఆసక్తి నెలకొంది. స్టూడెంట్ గా, సిఈఓ గా, రైతుగా ఇలా మూడు షేడ్స్ లో మహేష్ కనిపిస్తున్నాడు. ఇక ఈ చిత్రం ప్రమోషన్లలో భాగంగా తాజాగా ఓ ఇంటర్వ్యూలో పాల్గొన్నాడు మహేష్. ఇటీవల సుకుమార్ తో మహేష్ సినిమా ఆగిపోయింది. సుకుమార్ కి మహేష్ కు మధ్య మనస్పర్థలు వచ్చాయని.. భవిష్యత్తులో సుకుమార్ – మహేష్ కాంబినేషన్లో ఏ సినిమా ఉండదని పలు కథనాలు పుట్టుకొచ్చాయి. అయితే ఈ విషయం పై మహేష్ క్లారిటీ ఇచ్చాడు.
మహేష్ మాట్లాడుతూ.. ” ‘మహర్షి’ సినిమా తరువాత ఓ కామెడీ ఎంటర్టైనర్ చేయాలని అనుకున్నాను. అయితే సుకుమార్ గారు సీరియస్ గా సాగే ఒక కథను తీసుకొచ్చారు. అందువల్లనే ఆ కథను పక్కన పెట్టేసి, అనిల్ రావిపూడి వినిపించిన వినోదభరితమైన కథకి గ్రీన్ సిగ్నల్ ఇచ్చాను. ఓ చేంజ్ కోసం నేను ఈ కథను ఎంచుకున్నానని చెప్పినప్పుడు సుకుమార్ గారు కూడా ఆనందాన్ని వ్యక్తం చేశారు. భవిష్యత్తులో సుకుమార్ తో తప్పకుండా సినిమా చేస్తాను. అంతేకాదు రాజమౌళి గారితోనూ కథా చర్చలు జరుగుతున్నాయి. త్వరలోనే ఈ ప్రాజెక్టుకి సంబంధించిన ప్రకటన కూడా వస్తుంది” అంటూ చెప్పుకొచ్చాడు.
