నాని నిజంగా మజ్ను అయ్యేలా ఉన్నాడు..!

ఈ నెల 23న ‘మజ్ను’గా తెరమీదికొచ్చాడు యువ కథానాయకుడు నాని. ‘మజ్ను’ అంటే ముందుకు బానిస కాదు.. ప్రేమకు బానిస అని చెప్పిన ఈ హీరో నిజ జీవితంలో ‘మజ్ను’ అయ్యేలానే ఉన్నాడు. అదేంటి అతడి ప్రేమకి శుభం కార్డు పడి పెళ్లి కూడా జరిగిందిగా అంటే.. ఇతగాడు ప్రేమలో పడింది హీరోయిన్ తోనో లేక వేరే అమ్మాయితోనో కాదు ఓ సినిమాతో.నాని కెరీర్ లో ‘ఈగ’ సినిమా ఎంత కీలకమో ప్రత్యేకించి చెప్పాల్సిన పనిలేదు.

దర్శకధీరుడు రాజమౌళి తెరకెక్కించిన ఈ సినిమాతో దేశ వ్యాప్తంగా ప్రేక్షకులందరి దృష్టిలో పడ్డాడు నాని. ఒక్క మాటలో చెప్పాలంటే ‘బాహుబలి’తో ప్రభాస్ పేరు ఎలా మారుమోగిందో అలా అన్నమాట. ఇంకా ప్రభాస్ పరిస్థితే నయం. ప్రధాన పాత్ర అతడిదే గనక. నాని విషయానికొస్తే.. ఓ అరగంటలో ‘హరీ..’మంటాడు. అయినా ఆ సినిమాపై ఎనలేని ప్రేమ పెంచుకున్న నాని రాజమౌళి కలిసినప్పుడల్లా ఈగ సీక్వెల్ ఎప్పుడని అడగటం మానడట. ఒకవేళ రాజమౌళి ఆ సినిమా తీసినా లాజిక్ ప్రకారం అందులో నాని కనపడడు. మగధీరలో మాదిరి జన్మలకు ముడిపెడితే తప్ప. అయినా ఈగ సినిమా అభిమానిగా ఆ సీక్వెల్ ని కోరుకుంటున్నట్టు తెలిపాడు. అదీ ఈగపై మనసు పారేసుకున్న ఈ ‘మజ్ను’ అలియాస్ నాని కథ.