AKHANDA 2: ‘అఖండ 2’ బాక్సాఫీస్.. మరో డేరింగ్ స్టెప్!

నందమూరి బాలకృష్ణ, బోయపాటి శ్రీను కాంబినేషన్ అంటేనే థియేటర్లలో మాస్ జాతర. వీరిద్దరి కలయికలో వస్తున్న హ్యాట్రిక్ చిత్రం ‘అఖండ 2: తాండవం’ కోసం అభిమానులు చాలా కాలంగా ఎదురుచూస్తున్నారు. డిసెంబర్ 5న ప్రపంచవ్యాప్తంగా విడుదల కానున్న ఈ చిత్రంపై అంచనాలు భారీ స్థాయిలో ఉన్నాయి. అయితే, ఆ హైప్ ను మరింత పెంచేలా మేకర్స్ ఇప్పుడు ఒక సంచలన నిర్ణయం దిశగా అడుగులు వేస్తున్నట్లు తెలుస్తోంది.

AKHANDA 2

బాక్సాఫీస్ లెక్కలు మార్చేందుకు చిత్ర బృందం ‘పెయిడ్ ప్రీమియర్స్’ అస్త్రాన్ని ప్రయోగిస్తోంది. విడుదలకు ఒక రోజు ముందే, అంటే డిసెంబర్ 4వ తేదీ సాయంత్రమే రెండు తెలుగు రాష్ట్రాల్లో భారీ ఎత్తున ప్రీమియర్ షోలు వేయడానికి ప్లాన్ చేస్తున్నారట. సాధారణంగా చిన్న సినిమాలకు లేదా కంటెంట్ బేస్డ్ సినిమాలకు ఇలాంటి స్ట్రాటజీ వాడతారు. కానీ బాలయ్య లాంటి మాస్ హీరో సినిమాకు ఇలా ముందస్తు షోలు వేయడం అంటే గుండెధైర్యం ఉండాలి.

ఈ నిర్ణయం వెనుక బలమైన కారణమే ఉంది. సినిమా కంటెంట్ మీద మేకర్స్‌కు గట్టి నమ్మకం కుదిరినట్లుంది. ప్రీమియర్స్ ద్వారా పాజిటివ్ టాక్ స్ప్రెడ్ అయితే, మరుసటి రోజు ఓపెనింగ్స్ బీభత్సంగా ఉంటాయని వారి అంచనా. ఒకవేళ టాక్ ఏమాత్రం తేడా వచ్చినా అది మెయిన్ రిలీజ్ కలెక్షన్స్ మీద ప్రభావం చూపిస్తుంది. కానీ ఆ భయం లేకుండా ముందుకే వెళ్తున్నారంటే, అవుట్‌పుట్ ఎంత సాలిడ్‌గా వచ్చిందో అర్థం చేసుకోవచ్చు.

నైజాంలో ఈ సినిమాను దిల్ రాజు రిలీజ్ చేస్తున్నారు కాబట్టి, తెలంగాణలో పర్మిషన్లు, థియేటర్ల కేటాయింపు పెద్ద సమస్య కాకపోవచ్చు. ఏపీ ప్రభుత్వం నుంచి కూడా త్వరలోనే దీనికి సంబంధించిన జీవో వచ్చే అవకాశం ఉంది. అన్నీ కుదిరితే డిసెంబర్ 4 నుంచే థియేటర్ల దగ్గర ‘జై బాలయ్య’ నినాదాలు మారుమోగడం ఖాయం. ఫ్యాన్స్ ఈ వార్తతో ఫుల్ ఖుషీ అవుతున్నారు.

14 రీల్స్ ప్లస్ బ్యానర్‌పై భారీ బడ్జెట్‌తో తెరకెక్కుతున్న ఈ చిత్రంలో ప్రగ్యా జైస్వాల్, సంయుక్త మీనన్ నటిస్తున్నారు. తమన్ మరోసారి తన బ్యాక్‌గ్రౌండ్ స్కోర్‌తో శివతాండవం ఆడించడానికి రెడీ అయ్యాడు. మొత్తానికి ఈ ప్రీమియర్స్ ప్లాన్ వర్కవుట్ అయితే, ‘అఖండ 2’ బాక్సాఫీస్ వేట ఒక రోజు ముందే మొదలైనట్లే. చూడాలి మరి ఈ ‘తాండవం’ రికార్డుల కోటను ఎలా బద్దలు కొడుతుందో.